វិមានក្រឹមឡាំងនិយាយនៅថ្ងៃអង្គារនេះថា រុស្ស៊ីមានលោហៈធាតុកម្រច្រើនណាស់ ហើយពួកគេបើកទ្វារស្វាគមន៍ ដើម្បីផ្តល់កិច្ចព្រមព្រៀងអភិវឌ្ឍវា ក្រោយពេលដែលប្រធានាធិបតីរុស្ស៊ីលោក Vladimir Putin រក្សាលទ្ធភាពនៃកិច្ចសហប្រតិបត្តិការជាមួយសហរដ្ឋអាមេរិក ។

អ្នកនាំពាក្យវិមានក្រឹមឡាំងលោក Dmitry Peskov និយាយថា សហរដ្ឋអាមេរិកត្រូវកាលោហៈធាតុកម្រ ហើយពួកយើងមានវាច្រើនណាស់ ។

លោកបាននិយាយប្រាប់ក្រុមអ្នកសារព័ត៌មានថា ពួកយើងមានផែនការផ្ទាល់ខ្លួនរបស់ពួកយើង ដើម្បីអភិវឌ្ឍធនធានយុទ្ធសាស្រ្តទាំងអស់នេះ ប៉ុន្តែមាននូវទស្សនៈវិស័យទូលំទូលាយជាច្រើន សម្រាប់កិច្ចសហប្រតិបត្តិការនៅទីនេះ ។

ប្រធានាធិបតីរុស្ស៊ីលោក Vladimir Putin បាននិយាយប្រាប់ទូរទស្សន៍រដ្ឋកាលពីថ្ងៃចន្ទថា រុស្ស៊ី បើកទ្វារ ដើម្បីចូលរួមគម្រោងជាមួយដៃគូអាមេរិក រួមទាំងវិស័យរដ្ឋ និងវិស័យឯកជន ក្រោមកិច្ចព្រមព្រៀងសេដ្ឋកិច្ចនាពេលអនាគតរវាងរុស្ស៊ី និងសហរដ្ឋអាមេរិក ។

ប្រធានាធិបតីសហរដ្ឋអាមេរិកលោក Donald Trump បានសន្យាថា ប្រតិបត្តិការអភិវឌ្ឍន៍សេដ្ឋកិច្ចសំខាន់ៗជាមួយរុស្ស៊ី នឹងកើតមានឡើង ។

លោក Peskov បាននិយាយទៀតថា ពេលដែលវាមកដល់ ពួកយើងនឹងបើកទ្វារស្វាគមន៍កិច្ចសហប្រតិបត្តិការនេះលើលោហៈធាតុកម្ររបស់ពួកយើង ។

យោងតាមទិន្នន័យរបស់មន្ទីរស្ទង់ភូគព្ភសាស្រ្តសហរដ្ឋអាមេរិក បានឲ្យដឹងថា រុស្ស៊ីមានទុនបំរុងលោហៈធាតុកម្រធំបំផុតលំដាប់ទី ៥របស់ពិភពលោក បន្ទាប់ពីចិន ប្រេស៊ីល ឥណ្ឌា និងអូស្រ្តាលី ៕