ការដាច់ចរន្តអគ្គិសនីដ៏ធំនៅទូទាំងប្រទេសឈីលី បានធ្វើឱ្យរដ្ឋធានី សាន់ត្យាហ្គោ របស់ប្រទេសនេះធ្លាក់ក្នុងភាពងងឹតកាលពីថ្ងៃអង្គារ (២៥ កុម្ភៈ) ហើយបានកាត់ផ្តាច់ថាមពលដល់អណ្តូងរ៉ែទង់ដែងដ៏សំខាន់នៅភាគខាងជើងរបស់ប្រទេស ដោយធ្វើឱ្យទីផ្សារលោហធាតុពិភពលោកមានការរំខាន ព្រមទាំងបង្កផលប៉ះពាល់យ៉ាងខ្លាំងដល់ប្រជាជន។

ប៉ុន្មានម៉ោងបន្ទាប់ពីការដាច់អគ្គិសនីចាប់ផ្តើម ហើយភាពងងឹតបានគ្របដណ្ដប់ប្រទេស រដ្ឋាភិបាលឈីលីបានប្រកាសគ្រាអាសន្ន និងបង្កើតបម្រាមគោចរចាប់ពីម៉ោង ១០យប់ ដល់ម៉ោង ៦ព្រឹក (ម៉ោងក្នុងស្រុក) ពីតំបន់ភាគខាងជើង អារីកា (Arica) ទៅដល់តំបន់ភាគខាងត្បូង ឡូសឡាហ្គោ (Los Lagos)។

រដ្ឋមន្ត្រីមហាផ្ទៃ លោកស្រី ការ៉ូលីណា តូហា (Carolina Toha) បាននិយាយថា ការដាច់ចរន្តអគ្គិសនីយ៉ាងទូលំទូលាយនេះគឺបណ្តាលមកពីការបរាជ័យនៃខ្សែបញ្ជូនបណ្ដាញនៅភាគខាងជើងរបស់ប្រទេស ដោយច្រានចោលថាមិនមែនមកពីការវាយប្រហារតាមអ៊ីនធឺណិតនោះទេ។

យោងតាមសាក្សីរបស់សារព័ត៌មានរ៉យទ័របានឱ្យដឹងថា ការដាច់អគ្គិសនីដ៏ធំបំផុតរបស់ឈីលីក្នុងពេលប៉ុន្មានឆ្នាំមកនេះ បានមើលឃើញអំពូលភ្លើងបំភ្លឺផ្លូវក្នុងរដ្ឋធានីធ្លាក់ក្នុងភាពងងឹត ការកកស្ទះចរាចរណ៍ និងឧប្បត្តិហេតុតាមដងផ្លូវ ខណៈសំឡេងស៊ីរ៉ែនរថយន្តសង្គ្រោះបន្ទាន់បានលាន់លឺពាសពេញទីក្រុង។ រថភ្លើងក្រោមដីរបស់ក្រុងសាន់ត្យាហ្គោ ដែលដឹកជញ្ជូនអ្នកដំណើររាប់លាននាក់ ត្រូវបានបិទ ហើយអ្នកដំណើរត្រូវជម្លៀសចេញពីរថភ្លើងដែលជាប់គាំងទាំងនោះ៕