ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី បានស្នើលើកទឹកចិត្តឱ្យចិនបើក ការធ្វើដំណើរចេញ-ចូលប្រទេសរវាងតំបន់ទាំងពីរអាស៊ាន-ចិន ឡើងវិញ សំដៅពង្រឹង និងលើកស្ទួយនូវវិស័យទេសចរណ៍ សេវាកម្មដឹកជញ្ជូនតាមផ្លូវអាកាស សកម្មភាពធុរកិច្ចពាណិជ្ជកម្ម និងការវិនិយោគ។

ក្នុងពេលអញ្ជើញចូលរួមកិច្ចប្រជុំកំពូលពិសេសអាស៊ាន-ចិន ដើម្បីរំលឹកខួបអនុស្សាវរីយ៍លើកទី ៣០ នៃទំនាក់ទំនងដៃគូសន្ទនាអាស៊ាន-ចិន នៅព្រឹកថ្ងៃទី២២ ខែវិច្ឆិកានេះ សម្ដេចតេជោ ហ៊ុន សែន បានថ្លែងថា ក្នុងរយៈពេលបីទសវត្សរ៍កន្លងមកនេះអាស៊ាន-ចិន បានបង្កើតទំនាក់ទំនង​ដ៏ស្អិត​រមួត​ប្រកបដោយសាមគ្គីភាព និងផ្លែផ្កា ដែលផ្តល់ប្រយោជន៍ឱ្យគ្នាទៅវិញទៅមក និងចូលរួមចំណែក​យ៉ាង​សំខាន់ ក្នុងការនាំមកនូវសន្តិភាព ស្ថិរភាព សន្តិសុខ វិបុលភាព​ និងការអភិវឌ្ឍសង្គម-សេដ្ឋកិច្ច ប្រកបដោយចីរភាព ​និងបរិយាប័ន្ន ​នៅក្នុងតំបន់ទាំងពីរ។

ស្របពេលដែលចិនបានក្លាយជាប្រទេសមហាអំណាចឈានមុខមួយ ​និងមានតួនាទីកាន់តែសំខាន់ និង​ច្រើនឡើង ទាំងក្នុងតំបន់​ និងសកលលោក​ ហើយអាស៊ាន​ ក៏បានបំពេញ តួនាទីកាន់​តែ​ទូលំទូលាយ​នោះ ​ទំនាក់ទំនងអាស៊ាន-ចិន នឹងក្លាយជាទំនាក់ទំនងមួយ ដែលកាន់តែសំខាន់ និង​ចាំបាច់ និងដែលមានអត្ថន័យធំធេង ​និងប្រកបដោយផ្លែផ្កា ​សម្រាប់តំបន់ទាំងពីរ ក៏ដូចជា សម្រាប់​សកលលោក​ទាំងមូល ​ជាពិសេសនៅក្នុងបរិការណ៍នៃការស្តារ ​និងជំរុញកំណើនសង្គម-សេដ្ឋកិច្ច ឡើងវិញ ក្នុងបរិបទនៃជំងឺកូវីដ-១៩ ។

សម្តេចតេជោ បានបន្តថា ជាទិសដៅអនាគត កម្ពុជាសូមលើកទឹកចិត្តឱ្យអាស៊ាន-ចិន​ បន្តពង្រឹង ការតភ្ជាប់ក្នុងតំបន់ ស្របតាមស្មារតីនៃសេចក្តីថ្លែងការណ៍រួមអាស៊ាន-ចិន ស្តីពីការរួមផ្សំ​ផែនការ​មេតភ្ជាប់ អាស៊ាន ឆ្នាំ២០២៥ (MPAC 2025) ​និងគំនិត​ផ្តួចផ្តើម​ខ្សែក្រវាត់ និងផ្លូវ (BRI) ដើម្បី​បង្កើន​ប្រសិទ្ធភាព រំហូរទំនិញ សេវាកម្ម​ និងចលនាប្រជាជន​។

ជាមួយគ្នានេះ បន្ថែមលើកិច្ចព្រមព្រៀងពាណិជ្ជកម្មសេរី អាស៊ាន-ចិន ការទាញប្រយោជន៍​ជា​អតិបរិមា​ពីកិច្ចព្រមព្រៀង ​ស្តីពីភាពជាដៃគូសេដ្ឋកិច្ចគ្រប់ជ្រុងជ្រោយ ​ក្នុងតំបន់ (RCEP) គួរ​ត្រូវ​បាន​ជំរុញ​ និងយកចត្តិទុកដាក់បន្ថែម​ ដែលការណ៍នេះ​ នឹង​ពង្រឹងមូលដ្ឋានគ្រឹះ នៃ​កំណើន​សេដ្ឋកិច្ច​សម្រាប់​រយៈពេលវែង ​ព្រមទាំង​នឹងនាំមកនូវវិបុលភាពទៅវិញទៅមក​ ស្របតាមចក្ខុ វិស័យ នៃ​ភាព​ជាដៃគូយុទ្ធសាស្ត្រ អាស៊ាន-ចិន ឆ្នាំ ២០៣០។

សម្ដេចតេជោ បានបញ្ជាក់ថា កម្ពុជា សូមអបអរសាទរចំពោះប្រទេសចិន ​ដែលបានស្តារ និងជំរុញ កំណើន​សង្គម-សេដ្ឋកិច្ចឡើងវិញឆាប់រហ័ស ​ជាមួយនឹងកំណើនប្រមាណ៩,៨% ក្នុង​រយៈពេលត្រឹម​តែ៩ ​ខែដំបូង ក្នុងឆ្នាំនេះ។ ​កម្ពុជា ក៏សូមអរគុណ​ និងវាយតម្លៃ ​ខ្ពស់ចំពោះចិន ដែលបានចូលរួម​យ៉ាង​សកម្ម ​ក្នុងការប្រយុទ្ធនឹងជំងឺកូវីដ-១៩​ និង​ការស្តារ​ និងជំរុញកំណើនសង្គម-សេដ្ឋកិច្ចឡើងវិញ នៅកម្ពុជា ក៏ដូច ជានៅក្នុងតំបន់ និងសកលលោក៕

អត្ថបទ៖ មុត សុទ្ធ