ប្រជាជនអឺរ៉ុប មានការខកចិត្តកាន់តែខ្លាំងឡើង នៅពេលដែលពួកគេមើលឃើញមេដឹកនាំរបស់ខ្លួន និងអ្នកបង្កើតគោលនយោបាយដែលពួកគេជឿទុកចិត្ត ត្រូវបានដកចេញពីកិច្ចពិភាក្សាសំខាន់ៗស្តីពីវិបត្តិនៅអ៊ុយក្រែន។

គួររម្លឹកថា កិច្ចពិភាក្សារវាងសហរដ្ឋអាមេរិក និងរុស្ស៊ី ស្តីពីអ៊ុយក្រែន បានធ្វើឡើងនៅអារ៉ាប៊ីសាអ៊ូឌីត កាលពីសប្តាហ៍មុន ដោយមានរដ្ឋមន្ត្រីការបរទេសអាមេរិក លោក Marco Rubio និងរដ្ឋមន្ត្រីការបរទេសរុស្ស៊ី លោក Sergey Lavrov ប៉ុន្តែមិនរួមបញ្ចូលមន្ត្រីអឺរ៉ុប និងអ៊ុយក្រែនទេ។

ពលរដ្ឋអឺរ៉ុបមួយចំនួនធំបានសម្តែងការភ្ញាក់ផ្អើលចំពោះការដកចេញពីកិច្ចចរចានៅអារ៉ាប៊ីសាអ៊ូឌីតនេះ ដោយលើកហេតុផលថា កិច្ចខិតខំប្រឹងប្រែងរបស់អឺរ៉ុបក្នុងការបង្កើតជំហរបង្រួបបង្រួមលើវិបត្តិនេះគឺមិនមានប្រសិទ្ធភាពទាល់តែសោះ។

លោក ជែន អូប៊ើក (Jan Oberg) នាយកមូលនិធិអន្តរជាតិសម្រាប់សន្តិភាព និងការស្រាវជ្រាវអនាគត និងជាអ្នកប្រាជ្ញស៊ុយអែតដ៏លេចធ្លោមួយរូប បានចាត់ទុកការដកអឺរ៉ុបចេញពីកិច្ចចរចាសន្តិភាពអ៊ុយក្រែននេះ ថាទាក់ទងទៅនឹងការបង្កើតគោលនយោបាយមិនល្អរបស់សហភាពអឺរ៉ុប ដែលគូសបញ្ជាក់ដោយកង្វះខាតផ្នែកការទូតរបស់ខ្លួន។

សម្រាប់ពលរដ្ឋអ៊ុយក្រែនជាច្រើនដែលជាជនភៀសខ្លួននៅបរទេស រឿងនេះជាការខកចិត្តយ៉ាងខ្លាំង ដោយហេតុថាពួកគេទន្ទឹងរង់ចាំយ៉ាងអន្ទះសារដើម្បីត្រឡប់ទៅប្រទេសកំណើតវិញនៅពេលសង្គ្រាមបញ្ចប់៕