ភ្នំពេញ៖ មុនចាកចេញទៅកាន់អារ៉ាប់រួមកាលពីចុងសប្តាហ៍កន្លងទៅ ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានឱ្យដឹងថា រាជធានីភ្នំពេញត្រូវធ្វើជាម្ចាស់ផ្ទះការប្រកួតកីឡាយុវជនអាស៊ី ២០២៩។ ឯកឧត្ដមបញ្ជាក់បន្ថែមថា ហត្ថលេខីដែលគ្រោងចុះហត្ថលេខានៅទីក្រុងឌូបៃនេះគឺឯកឧត្ដមបណ្ឌិត ថោង ខុន ក្នុងនាមប្រធាន NOCC ដើម្បីទទួលបានសិទ្ធិធ្វើជាម្ចាស់ផ្ទះនាឆ្នាំ២០២៩ ខាងមុខ។
រីឯឯកឧត្ដម ឃួង ស្រេង អភិបាលរាជាធានីភ្នំពេញចុះហត្ថលេខាក្នុងនាមជាទីក្រុងម្ចាស់ផ្ទះ ដែលនេះគឺជាគោលការណ៍ច្បាប់នៃធម្មនុញ្ញរបស់គណៈកម្មាធិការអូឡាំពិកអន្តរជាតិ និងក្រុមប្រឹក្សាកីឡាអូឡាំពិកអាស៊ី។ នៅក្នុងបេសកកម្មនេះ គណៈប្រតិភូកម្ពុជានឹងបំពេញទស្សនកិច្ចការតាំងពិព័រណ៍អន្តរជាតិនៅទីក្រុងឌូបៃផងដែរ។ ឯកឧត្ដមអគ្គលេខាធិការបន្ថែមទៀតថា នេះជាកំណត់ត្រាប្រវត្តិសាស្ត្រថ្មីមួយដែលជាមោទនភាពរបស់ព្រះរាជាណាចក្រកម្ពុជា សម្រាប់ការទទួលរៀបចំធ្វើជាម្ចាស់ផ្ទះព្រឹត្តិការណ៍កីឡាអន្តរជាតិនេះ។ សូមជម្រាបជូនថា ការប្រកួតកីឡាយុវជនអាស៊ីដែលធ្វើឡើង ៤ឆ្នាំម្តងដំបូងធ្វើនៅប្រទេសសិង្ហបុរីឆ្នាំ២០០៩, ឆ្នាំ២០១៣ ធ្វើនៅទីក្រុងណានជីង ប្រទេសចិន, ឆ្នាំ ២០២១នេះនៅទីក្រុងសាន់ទូ ប្រទេសចិន, ឆ្នាំ២០២៥ នៅទីក្រុង Taskent ប្រទេសអូបេគីស្ថាន និងឆ្នាំ២០២៩ នៅរាជធានីភ្នំពេញ ព្រះរាជាណាចក្រកម្ពុជា៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
