ភាពច្របូកច្របល់ជុំវិញសារអេឡិចត្រូនិករបស់លោក Elon Musk ដែលបានទាមទារឱ្យបុគ្គលិករដ្ឋាភិបាល បង្ហាញភស្តុតាងត្រឹមត្រូវនៃការងាររបស់ពួកគេ បើមិនដូច្នេះទេត្រូវបាត់បង់ការងារ បន្ទាប់ពីទីប្រឹក្សាជាមហាសេដ្ឋីរបស់ប្រធានាធិបតី បានប្រាប់បុគ្គលិកសហព័ន្ធថា ពួកគេមាន«ឱកាស» ដើម្បីឆ្លើយតប។

វាផ្ទុយនឹងការណែនាំពីមន្ត្រីរដ្ឋបាល លោក Trump មួយចំនួន ដែលបាននិយាយថា សំណើសុំបែបនេះគឺត្រូវធ្វើដោយស្ម័គ្រចិត្ត។

អ្នកនាំពាក្យសេតវិមាន លោកស្រី Karoline Leavitt កាលពីថ្ងៃអង្គារ បានបញ្ជាក់ពីឱសានវាទរបស់លោក Musk ។ រដ្ឋបាលនេះកំពុងសួរ លោកប្រធានាធិបតី Trump ក៏កំពុងស្នើបុគ្គលិកសហព័ន្ធដែលរស់នៅពឹងផ្អែកលើប្រាក់តិចតួចនៃអ្នកបង់ពន្ធអាមេរិក ដើម្បីផ្ញើចំណុចចំនួនប្រាំនៃអ្វីដែលពួកគេបានធ្វើ កាលពីសប្តាហ៍មុន។

ការណែនាំថ្មីនេះ គឺជាការសាកល្បងចុងក្រោយថាតើ លោក Musk មានអំណាចគ្រប់គ្រងប៉ុណ្ណា នៅក្រសួងប្រសិទ្ធភាពរដ្ឋាភិបាល ឬ DOGE ជាអង្គភាពមួយដែលត្រូវបានបង្កើតឡើងដោយប្រធានាធិបតី លោក Donald Trump ដើម្បីកាត់បន្ថយការចំណាយរបស់រដ្ឋាភិបាល។ ទន្ទឹមនឹងនេះ បុគ្គលិក ២១ នាក់បានលាឈប់ការងារពីក្រសួងប្រសិទ្ធភាពរដ្ឋាភិបាល ក្នុងការតវ៉ាដោយនិយាយនៅក្នុងលិខិតមួយថា ពួកគេបានបដិសេធមិនសហការជាមួយនឹងកិច្ចខិតខំប្រឹងប្រែងកាត់បន្ថយនេះទេ។

រហូតមកដល់ពេលនេះ គំនិតផ្តួចផ្តើមរបស់លោក Musk បានឈានដល់ការកាត់រំសាយបុគ្គលិកជាង ២ ម៉ឺននាក់។ មេដឹកនាំសហជីព បានតវ៉ានៅខាងក្រៅការិយាល័យសេវាសុខភាពនិងមនុស្ស នៅទីក្រុងវ៉ាស៊ីនតោន ឌី.ស៊ី កាលពីថ្ងៃអង្គារ ដើម្បីឆ្លើយតបទៅនឹងការកាត់បន្ថយការថែទាំសុខភាព និងការស្រាវជ្រាវ។