ប្រធានាធិបតីម៉ិកស៊ិក លោកស្រី ក្លៅឌៀ សេនបោម(Claudia Sheinbaum) បាននិយាយកាលពីថ្ងៃអង្គារថា លោកស្រី រំពឹងថានឹងមានកិច្ចព្រមព្រៀងមួយក្នុងសប្តាហ៍នេះ ដើម្បីទប់ស្កាត់សហរដ្ឋអាមេរិកពីការដាក់ពន្ធបន្ថែម២៥ភាគរយ លើការនាំចេញរបស់ប្រទេសម៉ិកស៊ិក។

នៅក្នុងសន្និសីទសារព័ត៌មានប្រចាំថ្ងៃ លោកស្រី Sheinbaum បាននិយាយថា លោកស្រីមានផែនការពិភាក្សាជាមួយប្រធានាធិបតីសហរដ្ឋអាមេរិក លោក Donald Trump ដើម្បីបញ្ចប់កិច្ចព្រមព្រៀងនេះ និងបានសង្កត់ធ្ងន់លើភាពបន្ទាន់នៃការឈានដល់កិច្ចព្រមព្រៀងមួយនៅមុនថ្ងៃទី៤ ខែមីនា នៅពេលដែលរយៈពេលផ្អាកការចរចាជាមួយ លោក Trump ផុតកំណត់។

លោក Trump បាននិយាយកាលពីថ្ងៃច័ន្ទថា ការដាក់ពន្ធបន្ថែមលើប្រទេសម៉ិកស៊ិក និងប្រទេសកាណាដា នៅតែជាជម្រើសមួយ ជាផ្នែកនៃការជំរុញរបស់លោកសម្រាប់ពាណិជ្ជកម្មទៅវិញទៅមក ជាពិសេសជាមួយសហភាពអឺរ៉ុប។ លោកស្រី Sheinbaum បាននិយាយថា ប្រទេសម៉ិកស៊ិក ពុំមានការដំឡើងពន្ធលើទំនិញរបស់សហរដ្ឋអាមេរិកទេ ហើយការចរចាលើពាណិជ្ជកម្មនិងសន្តិសុខ កំពុងធ្វើឡើង។

កាលពីខែមុន លោក Trump បានផ្អាកការគំរាមកំហែងដំឡើងពន្ធរយៈពេល៣០ថ្ងៃ ដោយទាមទារឱ្យប្រទេសម៉ិកស៊ិក និងកាណាដា មានចំណាត់ការកាន់តែខ្លាំងប្រឆាំងការជួញដូរសារធាតុញៀនហ្វង់តានីល និងការធ្វើអន្តោប្រវសេន៍ខុសច្បាប់។

ជាការឆ្លើយតប ប្រទេសម៉ិកស៊ិកបានដាក់ពង្រាយកងទ័ពឆ្មាំជាតិចំនួន ១០.០០០នាក់ ទៅកាន់ព្រំដែនភាគខាងជើងរបស់ខ្លួន ខណៈសហរដ្ឋអាមេរិក បានសន្យាថានឹងបង្ក្រាបការរត់ពន្ធអាវុធ។