​បាល់ទាត់៖ ​ក្រុម​បិសាច​ក្រហម Manchester United បានសំរេច​ចែកផ្លូវ​គ្នា​ជាមួយ​អ្នកចាត់ការ​សញ្ជាតិ​ណ័​រវេ​សលោក Ole Gunnar Solskjaer ជា​ផ្លូវការ​ហើយ​ក្រោយ​បរាជ័យ​ធ្ងន់​ធ្ងរនៅ​ទឹកដី Watford ៤-១ កាលពី​ថ្ងៃ​សៅរ៍​។​ ​​ក្រុម​បិសាច​ក្រហម Manchester United ឈ្នះ​តែ ១​ប្រកួត​ប៉ុណ្ណោះ​ក្នុង ៧ប្រកួត​ចុងក្រោយ​នៅ English Premier League ដែល​ធ្វើឱ្យ​ធ្លាក់ខ្លួន​ដល់​លេខ ៧ ក្នុង​តារាង​នៅពេលនេះ​តាម​ពីក្រោយ Chelsea ដល់​ទៅ ១២ពិន្ទុ​។​

​​លោក Michael Carrick នឹង​ឡើងមក​កាន់តំណែង​បណ្តោះអាសន្ន​សិន​រហូត​ក្លិប​រកបាន​អ្នកចាត់ការ​ថ្មី​។ ទំរង់​លេង​ធ្លាក់ចុះ​ខ្លាំង​របស់ Manchester United គឺ​បូក​រួមទាំង​ចាញ់ Liverpool ៥-០ ក្នុង​ដី​ខ្លួនឯង ចាញ់ Manchester City ២-០ និង​ចាញ់ Leicester City ៤-២ ជាដើម​។ ​​រំលឹកថា​ លោក Ole Gunnar Solskjaer បាន​ចូលកាន់​តំណែង​បន្ត​ពី Jose Mourinho កាលពី​ខែធ្នូ​ ឆ្នាំ២០១៨ ក្នុង​លក្ខខណ្ឌ​ដឹកនាំ​បណ្តោះអាសន្ន មុន​ទទួលបាន​តំណែង​ពេញសិទ្ធិ​នៅ​ខែ​មិនា​ ឆ្នាំ២០១៩ ក្នុង​កិច្ចសន្យា ៣ឆ្នាំ​ហើយក៏​បាន​បន្ត​កិច្ចសន្យា​ថ្មី​កាលពី​ខែកក្កដា​ដឹកនាំ​ដល់​ឆ្នាំ២០២៤​។​ ​​តាំងពី​ការចាកចេញ​របស់ Sir Alex Ferguson នៅ​ឆ្នាំ២០១៣ Manchester United បាន​ផ្លាស់ប្តូរ​អ្នកចាត់ការ​អស់ ៤នាក់​ហើយ​រួមមាន David Moyes, Louis van Gaal, Jose Mourinho និង Ole Gunnar Solskjaer ដែល​កាន់តំណែង​បានយូរ​ជាងគេ​។

​​រដូវ​កាល​មុន Manchester United បាន​លេខ ២ នៅ Premier League ដេញ​ពីក្រោយ Manchester City ១២ពិន្ទុ និង​ចាញ់ Villarreal នៅ​វគ្គ​ផ្តាច់ព្រ័ត្រ​បាត់បង់​ពាន UEFA Europa League​។ ​​រដូវ​កាល​នេះ​កៅអី​ឈរ​លេខ ៧ នៅ Premier League, Manchester United កំពុង​ឈរលើ​គេ​ក្នុង​ពូ​ល​នៅ UCL ស្មើ​ពិន្ទុ​ជាមួយ Villarreal ដែល​នឹងត្រូវ​ជួបគ្នា​នៅ​ទឹកដី​អេ​ស្ប៉ា​ញយ​ប់​ថ្ងៃ​អង្គារ​ស្អែក​។ ​​ក្រោម​ការដឹកនាំ​របស់ Ole Gunnar Solskjaer សរុប ១៦៨ប្រកួត Manchester United ឈ្នះ ៩១ប្រកួត ស្មើ ៣៧ និង​ចាញ់ ៤០ ស៊ុត​បញ្ចូល​ទី​គេ ៣០៨គ្រាប់​របូត​វិញ ១៨៣គ្រាប់​៕

​អត្ថបទ​៖​នាង សុភា​វុ​ធ