ប្រធានាធិបតីចិន លោក ស៊ី ជីនពីង (Xi Jinping) បានជំរុញឲ្យមន្ត្រីទាំងអស់បន្តមានភាពនឹងនរ នៅចំពោះមុខបញ្ហាប្រឈម ទាំងក្នុងស្រុក និងសកល ដោយបង្ហាញសញ្ញាថា ទីក្រុងប៉េកាំងនឹងចាត់វិធានការឲ្យសមស្របទៅតាមការរឹតបន្តឹងពាណិជ្ជកម្ម និងការវិនិយោគថ្មីរបស់រដ្ឋបាលលោក Donald Trump។

ទីភ្នាក់ងារសារព័ត៌មាន Xinhua នៅថ្ងៃពុធ (ទី២៦ ខែកុម្ភៈ) នេះ បានរាយការណ៍ថា លោក ស៊ី បានធ្វើការកត់សម្គាល់បែបនេះទៅកាន់បណ្ដាមន្ត្រីជាន់ខ្ពស់ ក្នុងនោះរួមទាំងសមាជិកបក្ស នៅការិយាល័យនយោបាយ និងក្រុមប្រឹក្សារដ្ឋផងដែរ បន្ទាប់ពីបានពិនិត្យការងាររបស់មន្ត្រីទាំងអស់ កាលពីឆ្នាំមុន។

ហើយអ្វីដែលសំខាន់នោះ គឺថា ការអត្ថាធិប្បាយរបស់លោកនេះ ត្រូវបានធ្វើឡើងស្របពេលដែលប្រធានាធិបតីអាមេរិក លោក Trump កំពុងចាត់វិធានការដ៏ខ្លាំងក្លាបំផុតរបស់លោក ចំពោះប្រទេសចិន នៅក្នុងអាណត្តិទី២ នេះ ដោយធ្វើឲ្យមានហានិភ័យខ្ពស់ឡើងៗ ដែលថា ទំនាក់ទំនង រវាងប្រទេសទាំង២ អាចនឹងមានសភាពកាន់តែអាក្រក់ទៅៗយ៉ាងឆាប់រហ័ស។

លោក ស៊ី បានថ្លែងថា៖ «ប្រទេសចិនត្រូវតែពង្រឹងសមត្ថភាពនយោបាយរបស់ខ្លួន និងឆ្លើយតបយ៉ាងនឹងនរ ចំពោះបញ្ហាប្រឈមនានា ដែលកើតឡើង ដោយសារស្ថានភាពប្រែប្រួល ទាំងនៅក្នុងស្រុក និងអន្តរជាតិ»។

នៅក្នុងសុន្ទរកថាចុងក្រោយរបស់លោក លោក ស៊ី ក៏បានអំពាវនាវផងដែរដល់មន្ត្រីជាន់ខ្ពស់ទាំងឡាយឲ្យបន្តរក្សាស្ថិរភាពសង្គម លើកកម្ពស់ការងើបឡើងវិញនៃសេដ្ឋកិច្ចប្រកបដោយនិរន្តរភាព និងធ្វើឲ្យជីវភាពរស់នៅរបស់ប្រជាជនប្រសើរឡើងជាលំដាប់។

គួរបញ្ជាក់ថា រដ្ឋបាលរបស់លោក Trump បានបង្កើនសម្ពាធលើប្រទេសចិន ក្នុងរយៈពេលប៉ុន្មានថ្ងៃថ្មីៗនេះ ដោយចាត់វិធានការជាបន្តបន្ទាប់ លើពាណិជ្ជកម្ម និងការវិនិយោគ។ ចំណាត់ការទាំងនេះ រួមមានការរឹតបន្តឹងលើការចំណាយរបស់ចិន នៅក្នុងវិស័យយុទ្ធសាស្ត្ររបស់សហរដ្ឋអាមេរិក ដូចជាបច្ចេកវិទ្យា និងថាមពល ដោយជំរុញឲ្យប្រទេសម៉ិកស៊ិកដាក់ពន្ធផ្ទាល់ខ្លួន លើការនាំចូលរបស់ចិន និងទាមទារតម្លៃលើនាវាពាណិជ្ជកម្មដែលផលិត នៅក្នុងប្រទេសចិន ដើម្បីទប់ទល់នឹងភាពលេចធ្លោរបស់ប្រទេសនេះ ក្នុងការកសាងនាវា៕