ប្រធានាធិបតីឥណ្ឌូនេស៊ី លោក Prabowo Subianto ដែលចូលកាន់តំណែងកាលពីថ្ងៃទី២០ ខែតុលាឆ្នាំមុន បាននិយាយថា លោកនឹងមិនស្វែងរកអាណត្តិ ៥ឆ្នាំ ជាលើកទី២ នោះទេ ប្រសិនបើរដ្ឋបាលរបស់លោកបរាជ័យ ក្នុងការបំពេញតាមការរំពឹងទុករបស់សាធារណជន ដោយកំណត់ឆ្នាំ២០២៨ ជាការសាកល្បង សម្រាប់ភាពជាអ្នកដឹកនាំរបស់លោក។

អំឡុងសមាជរបស់គណបក្សប្រជាធិបតេយ្យ (Democratic Party) កាលពីល្ងាចថ្ងៃអង្គារ (ទី២៥ ខែកុម្ភៈ) លោក Prabowo បាននិយាយថា៖ «ប្រសិនបើក្នុងឆ្នាំទី៤ របស់ខ្ញុំ ខ្ញុំមិនពេញចិត្តនឹងការសម្រេចបានរបស់ខ្ញុំនោះទេ ខ្ញុំនឹងមិនចូលរួមប្រកួតប្រជែងទៀតឡើយ។ ខ្ញុំនឹងមានអារម្មណ៍ខ្មាសអៀនណាស់»។

គណបក្សនេះ គឺជាសមាជិកដ៏មានឥទ្ធិពលនៃរដ្ឋាភិបាលចម្រុះរបស់លោក។ អតីតឧត្តមសេនីយ៍ដែលនឹងឈានចូលវ័យ ៧៨ឆ្នាំ នៅឆ្នាំ២០២៩ ជាពេលដែលការបោះឆ្នោតបន្ទាប់ គ្រោងនឹងកើតឡើងនោះ បានកំណត់គោលដៅយ៉ាងខ្លាំងក្លា ក្នុងការជំរុញកំណើនសេដ្ឋកិច្ចប្រចាំឆ្នាំឲ្យដល់ប្រហែល ៨ភាគរយ នៅក្នុងអាណត្តិដំបូងរបស់លោក ពោលគឺពីកម្រិតប្រហែល ៥ភាគរយ នៅពេលនេះ។

កម្រិតនោះ គឺជាសមិទ្ធផលសេដ្ឋកិច្ចដែលឥណ្ឌូនេស៊ី សម្រេចមិនបាន តាំងពីមុនវិបត្តិហិរញ្ញវត្ថុអាស៊ី ឆ្នាំ ១៩៩៧-១៩៩៨។

ទោះបីជាមានការលើកឡើងរបស់លោក Prabowo ក៏ដោយ ក៏គណបក្ស Gerinndra របស់លោក នៅខែកុម្ភៈនេះ បានយល់ព្រមជាឯកច្ឆន្ទឲ្យលោកស្វែងរកអាណត្តិទី២។ ទោះបីជារដ្ឋធម្មនុញ្ញរបស់ឥណ្ឌូនេស៊ី កំណត់អាយុអប្បបរមា សម្រាប់បេក្ខជនតំណែងប្រធានាធិបតីក៏ដោយ ក៏មិនមានការកំណត់អាយុចាស់បំផុតដែលនឹងរារាំងរូបលោកមិនឲ្យឈរឈ្មោះ នៅក្នុងការបោះឆ្នោតឆ្នាំ២០២៩ នោះដែរ ហើយអ្នកកាន់តំណែងមុនលោកចំនួន ២រូប សុទ្ធតែបានបំពេញតួនាទីដ៏កំពូលរបស់ប្រទេសនេះ ២អាណត្តិដូចគ្នា៕