ចំនួនមនុស្សបានឡើងដល់ ២៥០.០០០នាក់ហើយ កាលពីថ្ងៃអង្គារ (ទី២៥ ខែកុម្ភៈ) សម្រាប់អ្នកដែលបានចុះហត្ថលេខាលើញត្តិទាមទារឲ្យដកសញ្ជាតិកាណាដារបស់លោក Elon Musk បន្ទាប់ពីបានចោទប្រកាន់លោកថា បានប្រឹងប្រែង «លុបបំបាត់» អធិបតេយ្យភាពរបស់ប្រទេសនេះ ។

គួរបញ្ជាក់ថា មហាសេដ្ឋីបច្ចេកវិទ្យារូបនេះបានកើតក្នុងគ្រួសារមានទ្រព្យសម្បត្តិស្ដុកស្ដម្ភ ក្នុងទីក្រុង Pretoria របស់អាហ្វ្រិកខាងត្បូង មុនពេលធ្វើអន្តោប្រវេសន៍ទៅកាន់ប្រទេសកាណាដា និងទទួលបានសញ្ជាតិ តាមរយៈម្តាយរបស់ខ្លួនឈ្មោះ Maye Musk ដែលមានដើមកំណើតមកពីខេត្ត Saskatchewan ។

ញត្តិដែលបានបើកឲ្យមានការចុះហត្ថលេខា នៅថ្ងៃទី២០ ខែកុម្ភៈ រៀបរាប់ថា លោក Musk «បានចូលរួមក្នុងសកម្មភាពដែលប្រឆាំងនឹងផលប្រយោជន៍ជាតិរបស់ប្រទេសកាណាដា»។

ញត្តិនោះក៏លើកឡើងផងដែរថា លោក Musk ដែលជាពលរដ្ឋអាមេរិក និងជាទីប្រឹក្សាជាន់ខ្ពស់របស់ប្រធានាធិបតី លោក Donald Trump បានក្លាយជា «សមាជិកនៃរដ្ឋាភិបាលបរទេសដែលកំពុងព្យាយាមលុបបំបាត់អធិបតេយ្យភាពកាណាដា»។

កាលពីថ្ងៃទី២៤ ខែកុម្ភៈ នៅក្នុងការបង្ហោះដែលពេលនេះត្រូវបានលុបវិញហើយនោះ លោក Musk បានចំអក ចំពោះញត្តិនោះ ដោយអះអាងថា «កាណាដាមិនមែនជាប្រទេសពិតប្រាកដនោះទេ»។ នេះជាការសរសេររៀបរាប់របស់លោក នៅលើបណ្ដាញសង្គម X ដែលលោកជាម្ចាស់៕