អង្គការមនុស្សធម៌របស់អង្គការសហប្រជាជាតិ បាននិយាយកាលពីថ្ងៃអង្គារថា ការបន្តការប្រយុទ្ធគ្នា នៅក្នុងខេត្តភាគខាងកើតនៃសាធារណរដ្ឋប្រជាធិបតេយ្យកុងហ្គោ (DRC) បានបណ្តាលឲ្យជនស៊ីវិលស្លាប់ និងរងរបួស និងប្រតិបត្តិការផ្តល់ជំនួយ ដែលត្រូវបានរឹតបន្តឹង។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានឲ្យដឹងថា ដៃគូក្នុងតំបន់របស់ខ្លួន បានរាយការណ៍ថា យ៉ាងហោចណាស់ជនស៊ីវិល ៤នាក់ ត្រូវបានសម្លាប់ និង ១៥ នាក់ បានរងរបួស នៅក្នុងការផ្ទុះឡើងនូវការប្រយុទ្ធគ្នា នៅក្នុងទឹកដីទីក្រុង Masisi នៃខេត្ត North Kivu។ ការប្រយុទ្ធគ្នានេះដែរ ក៏បានរំខានដល់កិច្ចខិតខំប្រឹងប្រែងមនុស្សធម៌ នៅក្នុងតំបន់ ដើម្បីកំណត់ប្រភេទនៃជំនួយដែលកំពុងត្រូវការ។

ទោះបីជាយ៉ាងណាក៏ដោយ នៅក្នុងតំបន់ South Kivu មន្ត្រីក្នុងតំបន់ បានរាយការណ៍ថា សាលារៀននៅក្នុងដែនដី Kalehe ចម្ងាយប្រហែល ៦៥គីឡូម៉ែត្រ ភាគខាងជើងនៃរដ្ឋធានី Bukavu ត្រូវបានបើកដំណើរការឡើងវិញជាបណ្តើរៗ។ កាលពីសប្តាហ៍មុន សាលារៀនជាច្រើន បានបិទទ្វារ ដោយសារការប្រយុទ្ធគ្នាបានបណ្តាលឲ្យសិស្សសាលា និងគ្រូបង្រៀន ប្រឈមនឹងហានិភ័យពីការរំលោភសិទ្ធិមនុស្សយ៉ាងធ្ងន់ធ្ងរ។

ក្រុមដៃគូមនុស្សធម៌របស់អង្គការ OCHA បានរាយការណ៍ថា យុទ្ធភ័ណ្ឌមិនទាន់ផ្ទុះ នៅតែជាបញ្ហា នៅក្នុងតំបន់ជាច្រើន ដែលរងផលប៉ះពាល់ដោយការប្រយុទ្ធនាពេលថ្មីៗនេះ រួមទាំងសាលារៀនចំនួនពីរ នៅក្នុងទីក្រុង Minova មានចម្ងាយប្រហែល ១៥០គីឡូម៉ែត្រភាគខាងជើងនៃទីក្រុង Bukavu។