រដ្ឋមន្ត្រីការពារជាតិអ៊ីស្រាអែល លោក Israel Katz បានថ្លែងថា យន្តហោះចម្បាំងរបស់អ៊ីស្រាអែល បានវាយប្រហារភាគខាងត្បូងប្រទេសស៊ីរី កាលពីយប់ថ្ងៃអង្គារ ដោយអះអាងថា ការវាយប្រហារនេះ គឺជាផ្នែកមួយនៃគោលនយោបាយថ្មីរបស់អ៊ីស្រាអែល ដែលធ្វើឲ្យភាគខាងត្បូងប្រទេសស៊ីរី គ្មានយោធា។

លោក Katz បាននិយាយនៅក្នុងសេចក្តីថ្លែងការណ៍មួយថា៖«កងទ័ពអាកាសបច្ចុប្បន្ន កំពុងវាយលុកយ៉ាងខ្លាំងក្លា នៅភាគខាងត្បូងប្រទេសស៊ីរី» ដោយបានបន្ថែមថា ការវាយប្រហារនេះ គឺជាផ្នែកមួយនៃគោលនយោបាយ ដែលបានប្រកាសកាលពីថ្ងៃចន្ទ ដោយលោកនាយករដ្ឋមន្ត្រី បេនចាមីន ណេតាន់យ៉ាហ៊ូ      ( Benjamin Netanyahu) ដើម្បី«ធ្វើឲ្យភាគខាងត្បូងប្រទេសនេះ គ្មានកងទ័ព»។

លោកបានលើកឡើងថា៖«សារនេះ គឺច្បាស់ណាស់: យើងនឹងមិនអនុញ្ញាតឲ្យភាគខាងត្បូងប្រទេសស៊ីរីក្លាយជាភាគខាងត្បូងលីបង់» ដោយបានបញ្ជាក់ថា ការប៉ុនប៉ងណាមួយដោយកងកម្លាំងរដ្ឋាភិបាលថ្មីរបស់ស៊ីរីនិងក្រុមសកម្មប្រយុទ្ធ ដើម្បីបង្កើតខ្លួនឯង នៅភាគខាងត្បូងប្រទេសស៊ីរី «នឹងត្រូវប្រឈមនឹងការវាយប្រហារ»។

ប្រព័ន្ធផ្សព្វផ្សាយស៊ីរី បានរាយការណ៍ថា យន្តហោះចម្បាំងអ៊ីស្រាអែល បានធ្វើការវាយប្រហារតាមអាកាសជាច្រើនដង នៅទូទាំងប្រទេសស៊ីរីភាគខាងត្បូង ខណៈដែលកងកម្លាំងជើងគោក បានរុលចូលទៅមុខ នៅចន្លោះទីក្រុង Daraa និង Quneitra នៅភាគខាងត្បូង។

យោធាអ៊ីស្រាអែល បានបញ្ជាក់នៅក្នុងសេចក្តីថ្លែងការណ៍មួយថា ការវាយប្រហារទាំងនោះ បានកំណត់គោលដៅទៅលើទីតាំងយោធា នៅក្នុងប្រទេសស៊ីរី រួមទាំងមជ្ឈមណ្ឌលបញ្ជាការ និងទីតាំងជាច្រើនដែលស្តុកទុកអាវុធ។