ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃចន្ទថា រុស្ស៊ី និងសហរដ្ឋអាមេរិក គួរតែចាត់វិធានការដំបូង ឆ្ពោះទៅរកការកសាងទំនុកចិត្តគ្នាទៅវិញទៅមក ដើម្បីដោះស្រាយវិបត្តិអ៊ុយក្រែន និងបញ្ហាសំខាន់ៗផ្សេងទៀត ដោយស្នើឲ្យមានលទ្ធភាពកិច្ចសហប្រតិបត្តិការ ក្នុងវិស័យនានា។

ក្នុងអំឡុងពេលផ្តល់បទសម្ភាសន៍ជាមួយអ្នកសារព័ត៌មានរបស់ទូរទស្សន៍ Russia-1 TV លោក Pavel Zarubin លោក ពូទីន បាននិយាយថា ទំនាក់ទំនងពាណិជ្ជកម្មរវាងក្រុមហ៊ុនរុស្ស៊ី និងអាមេរិក កំពុងដំណើរការរួចហើយ។

លោក ពូទីន បានបញ្ជាក់ថា ការសន្ទនាតាមទូរស័ព្ទនាពេលថ្មីៗនេះ ជាមួយប្រធានាធិបតីអាមេរិក លោក ដូណាល់ ត្រាំ រួមជាមួយនឹងការពិភាក្សារវាងមន្ត្រីរុស្ស៊ី និងអាមេរិក នៅទីក្រុងរីយ៉ាដ បានផ្តោតទៅលើបញ្ហាទាក់ទងនឹងវិបត្តិអ៊ុយក្រែន។ ទោះជាយ៉ាងណាក៏ដោយ ការចរចាជាច្រើនលើវិបត្តិនេះ មិនទាន់ចាប់ផ្តើមនៅឡើយទេ ហើយភាគីទាំងពីរ បានយល់ព្រមចាប់ផ្តើមធ្វើការងារនេះ។

លោកប្រធានាធិបតីរុស្ស៊ីរូបនេះ ពូទីន បាននិយាយថា អឺរ៉ុបចាំបាច់ត្រូវចូលរួមក្នុងការចរចាអំពីវិបត្តិអ៊ុយក្រែន។«អឺរ៉ុបបានបដិសេធមិនចរចាជាមួយរុស្ស៊ីពីមុនមក។ ប្រសិនបើពួកគេ ចង់ត្រឡប់មកវិញ នោះគឺជារឿងល្អបំផុត»។

ដោយអត្ថាធិប្បាយលើការបញ្ជានាពេលថ្មីៗនេះរបស់លោក ត្រាំ ឲ្យដំឡើងពន្ធ ២៥%លើដែក និងអាលុយមីញ៉ូម ដែលនាំចូលមកសហរដ្ឋអាមេរិកទាំងអស់នោះ លោក ពូទីន បាននិយាយថា អស់រយៈពេលជាច្រើនឆ្នាំមកនេះ គោលនយោបាយពាណិជ្ជកម្មរបស់សហរដ្ឋអាមេរិក ត្រូវបានផ្សារភ្ជាប់ទៅនឹងការដាក់ទណ្ឌកម្ម ដែលរុស្ស៊ីជឿថា ខុសច្បាប់ និងធ្វើឲ្យប៉ះពាល់ដល់ពាណិជ្ជកម្ម និងសេដ្ឋកិច្ចពិភពលោក។ លោកបានបន្តថា គោលនយោបាយពាណិជ្ជកម្មនេះ បានធ្វើឲ្យមានការខាតបង់ទាំងរុស្ស៊ី និងប្រទេសទាំងអស់ដែល   អនុវត្តទណ្ឌកម្ម។