នាយករដ្ឋមន្ត្រីអ៊ីរ៉ាក់ ម៉ូហាម៉េដ សៀ អាល់ស៊ូដានី Mohammed Shia' al-Sudaniកាលពីថ្ងៃអង្គារ បានពិភាក្សាជាមួយមន្ត្រីជាន់ខ្ពស់អង្គការសហប្រជាជាតិស្តីពីការពង្រឹងកិច្ចសហប្រតិបត្តិការ ដើម្បីជំរុញកិច្ចខិតខំប្រឹងប្រែងរួមគ្នា ឆ្ពោះទៅរកការសម្រេចបាននូវគោលដៅអភិវឌ្ឍន៍ប្រកបដោយនិរន្តភាព។

លោក អាល់ស៊ូដានី បានជួបប្រជុំជាមួយលោក Rola Dashti លេខាធិការប្រតិបត្តិនៃគណៈកម្មាធិការសេដ្ឋកិច្ច និងសង្គមរបស់អង្គការសហប្រជាជាតិសម្រាប់អាស៊ីខាងលិច ក្នុងអំឡុងពេលនោះ ពួកគេក៏បានពិភាក្សាអំពីការគាំទ្រសម្រាប់កម្មវិធីកំណែទម្រង់ហិរញ្ញវត្ថុ និងសេដ្ឋកិច្ចរបស់ប្រទេសអ៊ីរ៉ាក់ ជាពិសេសនៅក្នុងវិស័យអាទិភាពសេដ្ឋកិច្ច និងសង្គម។ នេះបើយោងតាមសេចក្តីថ្លែងការណ៍ពីការិយាល័យប្រព័ន្ធផ្សព្វផ្សាយរបស់លោក អាល់ស៊ូដានី ។

លោកនាយករដ្ឋមន្ត្រី បានបញ្ជាក់ជាថ្មីនូវការប្តេជ្ញាចិត្តរបស់រដ្ឋាភិបាលរបស់លោក ក្នុងការដោះស្រាយភាពក្រីក្រ និងភាពអត់ការងារធ្វើ ការធ្វើឲ្យប្រសើរឡើងនូវការផ្តល់សេវា និងការសម្រេចបាននូវការអភិវឌ្ឍជាក់ស្តែង។

លោកក៏បានលើកឡើងពីតួនាទីសំខាន់នៃបញ្ញាសិប្បនិមិត្ត និងការផ្លាស់ប្តូរឌីជីថល ក្នុងការជំរុញការអភិវឌ្ឍប្រកបដោយចីរភាព ដោយសង្កត់ធ្ងន់លើតម្រូវការសម្រាប់កិច្ចសហប្រតិបត្តិការជាមួយអង្គការអន្តរជាតិ ដើម្បីប្រើប្រាស់បច្ចេកវិទ្យាទាំងនេះ ដើម្បីគាំទ្រដល់កិច្ចខិតខំប្រឹងប្រែងកំណែទម្រង់សេដ្ឋកិច្ចរបស់ប្រទេសអ៊ីរ៉ាក់។