សហរដ្ឋអាមេរិក និងអ៊ីរ៉ាក់ បានពិភាក្សាអំពីការចាប់ផ្ដើមបន្តឡើងវិញនូវបំពង់បង្ហូរប្រេងដ៏សំខាន់ ដែលអាចបញ្ជូនប្រេងពីប្រទេសតំបន់មជ្ឈិមបូព៌ាទៅកាន់ទីផ្សារពិភពលោក បន្ទាប់ពីការតភ្ជាប់នេះ ស្ទើរតែត្រូវបានបិទ ចាប់តាំងពីឆ្នាំ២០២៣ ក្រោយមានជម្លោះលើបញ្ហាតម្លៃ ក្នុងតំបន់។

បើយោងតាមសេចក្តីថ្លែងការណ៍ កាលពីថ្ងៃអង្គារ (ទី២៤ ខែកុម្ភៈ) នៅលើគេហទំព័ររបស់ក្រសួងការបរទេសអាមេរិក បានឲ្យដឹងថា រដ្ឋមន្ត្រីការបរទេសសហរដ្ឋអាមេរិក លោក Marco Rubio និងនាយករដ្ឋមន្ត្រីអ៊ីរ៉ាក់ លោក Mohammed Shia Al-Sudani បានព្រមព្រៀងគ្នាលើតម្រូវការ ដើម្បីឲ្យប្រទេសអ៊ីរ៉ាក់បើកដំណើរការឡើងវិញយ៉ាងឆាប់រហ័ស។

លទ្ធភាពនៃដំណើរការឡើងវិញ សម្រាប់បំពង់បង្ហូរប្រេងដែលទីក្រុងបាកដាដ បានរំពឹងថា ទំនងជានឹងចាប់ផ្ដើមបន្តឡើងវិញជាមួយនឹងលំហូរដំបូងប្រហែល ១៨៥.០០០បារ៉ែល ក្នុងមួយថ្ងៃ បានដាក់បន្ទុកលើតម្លៃប្រេង ចាប់តាំងពីអ៊ីរ៉ាក់ បានប្រាប់ថា ខ្លួនបានត្រៀមរួចជាស្រេច ក្នុងការប្រតិបត្តិការឡើងវិញ។

វឌ្ឍនភាពនេះកើតមានឡើងក្នុងពេលវេលាដ៏រសើប សម្រាប់ទីផ្សារថាមពល ស្របពេលដែលប្រធានាធិបតីអាមេរិក លោក Donald Trump បាន និងកំពុងអំពាវនាវឲ្យបញ្ចុះតម្លៃប្រេង។ តម្លៃប្រេងឆៅ កាលពីថ្ងៃទី២៥ ខែកុម្ភៈ បានធ្លាក់ចុះទាបបំផុត ក្នុងឆ្នាំ២០២៥ នេះ ដោយសារក្ដីបារម្ភ អំពីកំណើនសេដ្ឋកិច្ច។

រដ្ឋមន្ត្រីប្រេងអ៊ីរ៉ាក់ លោក Hayan Abdul Ghani នៅសប្តាហ៍នេះ បាននិយាយថា ប្រទេសរបស់លោក កំពុងទាក់ទងជាមួយប្រទេសទួរគី ដើម្បីពិភាក្សាអំពីបញ្ហាបច្ចេកទេស មុនពេលដែលខ្លួនអាចចាប់ផ្ដើមបញ្ជូនឡើងវិញ តាមរយៈបំពង់បង្ហូរប្រេងដែលរត់ទៅកាន់កំពង់ផែ Ceyhan របស់ទួរគី នៅលើសមុទ្រមេឌីទែរ៉ាណេ៕