មន្ទីរភូគព្ភសាស្រ្តសហរដ្ឋអាមេរិក(USGS)រាយការណ៍ថា ការរញ្ជួយដីរាក់កម្រិត ៦,១រ៉ិចទ័រ បានអង្រួនកោះ Sulawesi របស់ប្រទេសឥណ្ឌូនេស៊ីនាថ្ងៃពុធនេះ បង្ខំឲ្យប្រជាពលរដ្ឋនាំគ្នារត់ចេញក្រៅ ប៉ុន្តែគ្មានសេចក្តីរាយការណ៍ពីការខូចខាត ឬរងគ្រោះនោះទេ ។

USGS រាយការណ៍ថា ភាពរំញ័រ បានកើតមានឡើងនៅវេលាម៉ោង ៦ និង ៥៥នាទីព្រឹកម៉ោងក្នុងស្រុក ក្នុងជម្រៅដី ១០គ.ម ក្នុងនោះចំណុចកណ្តាលនៃការរញ្ជួយដីស្ថិតនៅជិតតំបន់ឆ្នេរខេត្ត North Sulawesi ។

ទីភ្នាក់ងារឧតុនិយមឥណ្ឌូនេស៊ី បានរាយការណ៍ពីការរញ្ជួយដីកម្រិត ៦រ៉ិចទ័រ ហើយពួកគេនិយាយថា គ្មានហានិភ័យនៃរលកស៊ូណាមិនោះទេ ។

ប្រជាពលរដ្ឋរស់នៅក្នុងខេត្ត North Sulawesi បាននិយាយរៀបរាប់ពីភាពតក់ស្លុត ពេលដែលការរញ្ជួយដីកើតឡើង ។

លោក Gita Waloni គឺជាភ្ញៀវមួយរូបស្នាក់នៅក្នុងសណ្ឋាគារនៅស្រុក North Minahasa ក្នុងខេត្ត North Sulawesi និយាយប្រាប់ទីភ្នាក់ងារព័ត៌មាន AFP ថា លោកបានភ្ញាក់ពីដំណេក ពេលដែលលោកដឹងថាមានការរញ្ជួយដី ។ វាមានភាពរញ្ជួយខ្លាំង ហើយអគារបានយោលដូចទោង ។

លោកបន្តថា វត្ថុនៅក្នុងបន្ទប់របស់លោក បានរាត់រាយ ហើយលោកក៏បានរត់ចេញក្រៅ លោកពិតជាខ្លាចខ្លាំងណាស់ ខ្លាចមានរលករញ្ជួយ ខណៈពេលលោកនៅក្នុងបន្ទប់ ។ ភ្ញៀវទាំងអស់នៅក្នុងសណ្ឋាគារបានរត់ចេញក្រៅដូចគ្នា ៕