ប្រជាពលរដ្ឋរស់នៅក្នុងទីក្រុង Sweida ស្ថិតនៅតំបន់ភាគខាងត្បូងប្រទេសស៊ីរី បានច្រានចោលឥទ្ធិពលបរទេសលើប្រទេសរបស់ពួកគេ ស្របពេលនាយករដ្ឋមន្រ្តីអ៊ីស្រាអែលលោក Benjamin Netanyahu និយាយថា អ៊ីស្រាអែលនឹងមិនបណ្តោយឲ្យមានក្រុមឧទ្ទាម Hayat Tahrir al-Sham(HTS) នៅតំបន់ភាគខាងត្បូងប្រទេសស៊ីរីនោះឡើយ ។

ចំណែកឯប្រជាពលរដ្ឋរស់នៅក្នុងទីក្រុង Druze និយាយថា ពួកគេសង្ឃឹមថា រដ្ឋាភិបាលថ្មីនឹងឆ្លើយតបចំពោះការអះអាងរបស់លោក Netanyahu ។

អ៊ីស្រាអែល បាននិយាយកាលពីថ្ងៃអាទិត្យកន្លងទៅថា ពួកគេលែងអាចអត់ធ្មត់បានទៀតហើយចំពោះវត្តមានរបស់ក្រុមឧទ្ទាម HTS នៅតំបន់ភាគខាងត្បូងស៊ីរី ឬកងកម្លាំងប្រដាប់អាវុធណាមួយដែលមានទំនាក់ទំនងជាមួយរដ្ឋាភិបាលថ្មី ហើយពួកគេទាមទារឲ្យដែនដីមួយនេះ គ្មានយោធា ។

គួរឲ្យដឹងថា ក្រុមឧទ្ទាម HTS ដណ្តើមបានការគ្រប់គ្រងទីក្រុងដាម៉ាស់កាលពីថ្ងៃទី ៨ ខែធ្នូ ឆ្នាំ ២០២៤កន្លងទៅ អំឡុងការវាយប្រហារលឿនដូចផ្លេកបន្ទោរដ៏គួរភ្ញាក់ផ្អើលរបស់ពួកគេ ដើម្បីបញ្ចប់ការគ្រប់គ្រងរបស់អតីតប្រធានាធិបតីលោក Bashar al-Assad និងជំរុញឲ្យអ៊ីស្រាអែលបញ្ជូនកងទ័ពរបស់ពួកគេចូលទៅកាន់តំបន់គ្មានកងទ័ពដែលត្រួតពិនិត្យដោយអង្គការសហប្រជាជាតិ(UN) នៅក្នុងប្រទេសស៊ីរី ។

លោក Netanyahu បាននិយាយថា អ៊ីស្រាអែលនឹងរក្សាការឈរជើងរបស់ពួកគេនៅទីនោះ ជាវិធានការការពារ និងដរាបណាវានៅចាំបាច់ ។ 

ទោះបីជាយ៉ាងណាក៏ដោយ ស៊ីរីបានទាមទារឲ្យអ៊ីស្រាអែលដកកងទ័ពចេញពីប្រទេសរបស់ពួកគេ ហើយ UN បាននិយាយថា វិធានការរបស់អ៊ីស្រាអែលបែបនេះ បានបំពានកិច្ចព្រមព្រៀងអន្តរជាតិ ហើយពួកគេបានអំពាវនាវឲ្យអ៊ីស្រាអែលដកកងទ័ពចេញពីទីនោះផងដែរ ៕