ក្រុមហាម៉ាស់ និយាយថា ពួកគេនឹងដោះដូរសាកសពចំណាប់ថ្នូរអ៊ីស្រាអែល ៤នាក់ សម្រាប់អ្នកទោសប៉ាឡេស្ទីនជាង ៦០០នាក់នៅថ្ងៃព្រហស្បតិ៍ស្អែកនេះ ស្របតាមដំណាក់កាលដំបូងនៃកិច្ចព្រមព្រៀងបទឈប់បាញ់តំបន់ហ្កាហ្សា ។

នៅថ្ងៃពុធនេះ អ្នកកាន់ទុក្ខអ៊ីស្រាអែលរាប់ពាន់នាក់ បានជួបជុំគ្នា ដើម្បីរៀបចំពិធីបុណ្យសពរបស់អ្នកស្រី Bibas និងកូនប្រុស ២នាក់របស់គាត់ ដែលបានស្លាប់ អំឡុងពេលជាប់ជាចំណាប់ថ្នូរនៅតំបន់ហ្កាហ្សា ។

បទឈប់បាញ់នេះ បានបញ្ឈប់សង្រ្គាមរវាងក្រុមអ៊ីស្រាអែល និងក្រុមហាម៉ាស់ ដែលបង្កឡើងដោយសារការវាយប្រហារកាលពីថ្ងៃទី ៧ ខែតុលា ឆ្នាំ ២០២៣ ហើយចំណាប់ថ្នូរ ២៥នាក់ ត្រូវបានដោះលែងនៅមានជីវិតមកទល់នឹងពេលនេះ ជាការដោះដូរនឹងអ្នកទោសប៉ាឡេស្ទីនរាប់រយនាក់ ។

មន្រ្តីមួយរូបរបស់ក្រុមហាម៉ាស់ និយាយប្រាប់ទីភ្នាក់ងារព័ត៌មាន AFPថា ក្រុមអ្នកសម្របសម្រួលបានជូនដំណឹងក្រុមហាម៉ាស់ថា ការដោះដូរចំណាប់ថ្នូរ និងអ្នកទោស ត្រូវធ្វើឡើងនៅថ្ងៃព្រហស្បតិ៍ ហើយជាការដោះដូរគ្នា អ៊ីស្រាអែល នឹងដោះលែងអ្នកទោសប៉ាឡេស្ទីនជាង ៦០០នាក់ ៕