(ភ្នំពេញ) ឯកឩត្តម. រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុកម្ពុជា បានទទួលស្វាគមន៍ ឯកឩត្តម. សាឡា អ៉ីសា ស្ថានកុង ស៊ុលកិត្តិយសប្រទេសស៊ីបប្រចាំកម្ពុជានិងជាតំណាងស្ថានកុងស៊ុលកិត្តិយសប្រចាំនៅកម្ពុជាផ្សេងទៀតរួមមាន កុងស៊ុលកិត្តិយសប្រទេសអូស្ត្រាលី H.E Markus Gridling, ស្ថានកុងស៊ុលអ៉ីតាលី H.E Aurelio Flacco, ស្ថានកុងស៊ុលស៊ុយអ៊ែត H.E Kim Tol Tan, ស្ថានកុងស៊ុលហូឡង់ H.E Gerhard Jan និងស្ថានកុងស៊ុលម៉ិកស៊ិក H.E Seng Takakneary នាថ្ងៃទី២៥ កុម្ភៈ ២០២៥ នេះ ក្នុងគោលបំណងពង្រឹងទំនាក់ទំនងពាណិជ្ជកម្ម និងសេដ្ឋកិច្ចរវាងប្រទេសកម្ពុជា ជាមួយសមាជិកសហភាពអឺរ៉ុប និង ម៉ិកស៊ិក ។

   យោងតាមឯកឩត្តម. សាឡា អ៉ីសា ស្ថានកុង ស៊ុលកិត្តិយសប្រទេសស៊ីបប្រចាំកម្ពុជាបានឲ្យដឹងថា កិច្ចប្រជុំនេះបានគូសបញ្ជាក់ពីការប្តេជ្ញាចិត្តជាបន្តរបស់សមាជិកសហភាពអឺរ៉ុប និងម៉ិកស៊ិក ក៏ដូចជាកម្ពុជាក្នុងការពង្រឹងភាពជាដៃគូសេដ្ឋកិច្ច និងផ្តោតលើប្រធានបទសំខាន់ៗមួយចំនួន ជាពិសេសឱកាសវិនិយោគក្នុងការស្វែងរកមធ្យោបាយសម្រាប់ការកើនឡើងនៃការវិនិយោគរបស់សហភាពអឺរ៉ុបនៅកម្ពុជា។ហើយកិច្ចសន្ទនាពាក់ព័ន្ធនឹងការបញ្ជាក់អំពីបទប្បញ្ញត្តិ ការកំណត់វិស័យពាណិជ្ជកម្ម និងការដោះស្រាយបញ្ហាប្រឈមដែលសហភាពអឺរ៉ុប និងម៉ិកស៊ិកដែលកំពុងប្រតិបត្តិការក្នុងប្រទេសកម្ពុជា។ តួយ៉ាងកិច្ចប្រជុំនេះបានផ្តល់នូវវេទិកាសម្រាប់ផ្លាស់ប្តូរទស្សនៈលើកិច្ចខិតខំប្រឹងប្រែងអភិវឌ្ឍន៍ និងកំណែទម្រង់សេដ្ឋកិច្ចរបស់កម្ពុជា ដោយសង្កត់ធ្ងន់លើសារៈសំខាន់នៃការគ្រប់គ្រងហិរញ្ញវត្ថុសាធារណៈ កំណែទម្រង់ពន្ធដារ និងតំបន់កំណើនសេដ្ឋកិច្ចប្រកបដោយនិរន្តរភាព ដែលសហភាពអឺរ៉ុប និងម៉ិកស៊ិកបាននឹងកំពុងបន្តការគាំទ្រ។

   ប្រភពដដែលបានបញ្ជាក់ថា ជាចុងក្រោយក្នុងជំនួបនេះបានស្វែងយល់ពីយុទ្ធសាស្ត្រក្នុងការសម្រួលដល់លំហូរពាណិជ្ជកម្ម ជំរុញការនាំចេញរបស់កម្ពុជាទៅកាន់ទីផ្សារសហភាពអឺរ៉ុប និងម៉ិកស៊ិក និងធានាបាននូវការអនុលោមតាមស្តង់ដារអន្តរជាតិ។ បន្ថែមពីនេះ ជំនួបនេះក៏បានឆ្លុះបញ្ចាំងពីការយកចិត្តទុកដាក់របស់សហភាពអឺរ៉ុប និងម៉ិកស៊ិក ក្នុងការជួយដល់ការ អភិវឌ្ឍន៍សេដ្ឋកិច្ចរបស់កម្ពុជា និងជំរុញកិច្ចសហប្រតិបត្តិកាសម្រាប់ការកសាងទំនាក់ទំនងសេដ្ឋកិច្ចឱ្យកាន់តែរឹងមាំ និងលើកកម្ពស់វិបុលភាពទៅវិញទៅមកផងដែរ ៕