មន្ត្រីសុខាភិបាលប្រចាំរដ្ឋតិចសាស់ បាននិយាយកាលពីថ្ងៃពុធ (២៦ កុម្ភៈ) ថា កុមារម្នាក់នៅរដ្ឋ West Texas បានស្លាប់ដោយសារជំងឺកញ្ជ្រឹល ដែលជាការស្លាប់ដំបូងបំផុតនៅសហរដ្ឋអាមេរិក ដោយសារជំងឺដែលឆ្លងខ្លាំងមួយនេះក្នុងរយៈពេលមួយទសវត្សរ៍ ខណៈដែលការផ្ទុះឡើងនៃរដ្ឋតិចសាស់ បានកើនឡើងពីករណីមួយចំនួនតូច ដល់ជាង ១៣០ករណី នៅទូទាំងរដ្ឋចំនួនពីរ ដោយអាជ្ញាធរព្រមានពីគ្រោះថ្នាក់យ៉ាងកាចសាហាវពីស្ថានភាពនេះ។

ទីភ្នាក់ងារសុខភាពរដ្ឋតិចសាស់ បាននិយាយថា កុមាររងគ្រោះដែលមិនបានចាក់វ៉ាក់សាំងប្រឆាំងនឹងជំងឺនេះ បានស្លាប់ក្នុងពេលមួយយប់នៅក្នុងមន្ទីរពេទ្យកុមារមួយកន្លែង។ មន្ទីរសុខាភិបាលនៃរដ្ឋ New Mexico បានព្រមានថា "ដោយសារតែជំងឺនេះគឺឆ្លងខ្លាំងណាស់ ករណីបន្ថែមជាច្រើនទៀតទំនងជានឹងកើតឡើង" ខណៈឪពុកម្ដាយជាច្រើនមិនបានចាក់វ៉ាក់សាំងប្រឆាំងជំងឺនេះឱ្យកូនៗរបស់ពួកគេ។

ក្នុងអំឡុងពេលកិច្ចប្រជុំគណៈរដ្ឋមន្ត្រីកាលពីថ្ងៃពុធ លោក Robert F. Kennedy Jr ដែលជាអ្នករិះគន់វ៉ាក់សាំង និងជារដ្ឋមន្រ្តីសុខាភិបាលថ្មីបាននិយាយថា មនុស្សពីរនាក់បានស្លាប់នៅរដ្ឋតិចសាស់ ប៉ុន្តែអាជ្ញាធរសុខាភិបាលនៅរដ្ឋតិចសាស់ និង ញូវ ម៉ិកស៊ិកូ (New Mexico) បានបញ្ជាក់ពីការស្លាប់តែម្នាក់ប៉ុណ្ណោះគឺនៅរដ្ឋតិចសាស់។

ប្រធានផ្នែកវេជ្ជសាស្ត្រនៅមន្ទីរពេទ្យ Lubbock បាននិយាយថា អ្នកជំងឺបង្ហាញរោគសញ្ញាដូចជា គ្រុនក្តៅខ្លាំង ភ្នែកឡើងក្រហម តឹងច្រមុះ ក្អក និងកន្ទួលដែលចាប់ផ្តើមកើតឡើងនៅលើមុខ។

យោងតាមមជ្ឈមណ្ឌលគ្រប់គ្រង និងបង្ការជំងឺ បានឱ្យដឹងថា អត្រាមរណភាពរបស់អាមេរិកដោយសារកញ្ជ្រឹល ដែលសាយភាយតាមខ្យល់មកពីដំណក់ទឹកផ្លូវដង្ហើមចេញពីការក្អក ឬកណ្តាស់ គឺមានចំនួនអ្នកស្លាប់ពី ១ ទៅ ៣ នាក់ក្នុងចំណោមករណីដែលរាយការណ៍ចំនួន ១.០០០នាក់ ហើយការស្លាប់ចុងក្រោយរបស់អាមេរិក ដោយសារជំងឺនេះគឺនៅឆ្នាំ២០១៥៕