កីឡាអេឡិចត្រូនិក៖ ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែកាលពីចុងសប្ដាហ៍កន្លងទៅ ស្ថាប័នកីឡាអេឡិចត្រូនិកអន្ដរជាតិ Mobile Legends: Bang Bang បានរៀបចំព្រឹត្តិការណ៍តាមអនឡាញមួយ ដោយអញ្ជើញសិល្បករ និងវិចិត្រករឲ្យរចនាទូក «ង» Mobile Legends សម្រាប់ឲ្យប្រជាពលរដ្ឋ ពិសេសយុវជនចូលទស្សនា និងលេងកម្សាន្តក្នុងន័យអបអរព្រះរាជពិធីបុណ្យប្រពៃណីជាតិខ្មែរនេះ។
កម្មវិធីនេះក៏មិនខុសពីឆ្នាំមុនដែរ គឺដើម្បីផ្ដល់នូវការកម្សាន្តក្នុងឱកាសថ្ងៃឈប់សម្រាកនៃបុណ្យអុំទូក ទោះបីពិធីបុណ្យជាតិដ៏ធំនេះមិនអាចប្រារព្ធក្នុងឆ្នាំនេះដោយសារវិបត្តិកូវីដ-១៩ ក៏ដោយ។ ចំពោះការរចនាទូក «ង» Mobile Legends ត្រូវបានរំលេចខ្លឹមសារ «សហការដើម្បីជ័យជម្នះ» ដែលជាការផ្សារភ្ជាប់គ្នារវាងស្មារតីនៃអ្នកប្រណាំងទូកប្រពៃណីជាតិខ្មែរ និងស្មារតីនៃកីឡាអេឡិចត្រូនិក មានន័យថា កីឡាអេឡិចត្រូនិកនឹងក្លាយជាមធ្យោបាយថ្មីមួយ ដើម្បីរួមចំណែកផ្សព្វផ្សាយពីវប្បធម៌ប្រពៃណីជាតិខ្មែរ។ ទូក «ង» នេះមានកៅអីចំនួន ៥ ដែលមានអត្តពលិក ៥រូបក្នុងការប្រកួតកីឡា Mobile Legends។ អ្វីដែលពិសេស ទូកនេះត្រូវបានបង្កើតឡើងតាមរចនាបទប្រពៃណី និងមានសមាសធាតុរបស់ហ្គេមនៅលើទូក ដែលរំលេចនូវភាពស្រស់ស្អាតទាក់ទាញ ហើយសក្ដិសមនឹងព្រះរាជពិធីបុណ្យអុំទូក។
ទោះបីជាមិនមានសកម្មភាពប្រណាំងទូកពិតប្រាកដ នៅទន្លេចតុមុខទល់មុខព្រះបរមរាជវាំងឆ្នាំនេះក៏ដោយ ក៏ការប្រកួត Mobile Legends នៅតែបន្តដំណើរការ ខណៈអ្នកឈ្នះនឹងមានឱកាសចូលរួមក្នុងពិធីបង្ហាញទូក «ង» របស់ Mobile Legends ទៀតផង។ សូមបញ្ជាក់ថា ស្ថិតក្រោមជំងឺរាតត្បាតជាសកលកូវីដ-១៩ ដោយមានការអភិវឌ្ឍន៍សង្គម និងវប្បធម៌មានវិធីជាច្រើនដែលអាចឲ្យពលរដ្ឋចូលរួមអបអរព្រះរាជពិធីបុណ្យអុំទូក ជាក់ស្ដែង Mobile Legends បានចាប់ផ្ដើមជំហានដំបូងរបស់ខ្លួនដើម្បីដាក់ចូលនៅវប្បធម៌ និងប្រពៃណីទៅក្នុងកម្មវិធីកីឡាអេឡិចត្រូនិចរបស់ខ្លួន ហើយផ្តល់ជូនដល់អ្នកលេងអាចចូលរួមនូវសកម្មភាព វប្បធម៌តាមអនឡាញដ៏ល្អដែលមិនធ្លាប់មាននេះផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
