លោកប្រធានាធិបតីបារាំង Emmanuel Macron មិនអាចទទួលបានការធានាច្បាស់លាស់ពីប្រធានាធិបតីសហរដ្ឋអាមេរិក Donald Trump លើការធានាសន្តិសុខរបស់អាមេរិកសម្រាប់អ៊ុយក្រែនបានទេ នៅឯសេតវិមានក្នុងសប្តាហ៍នេះ អំឡុងជំនួបជាមួយលោក Trump នេះបើយោងតាមក្រុមមន្ត្រីនិងអ្នកការទូតសហភាពអឺរ៉ុប។

កាលពីព្រឹកថ្ងៃពុធសប្ដាហ៍នេះ ប្រធានាធិបតីបារាំងបានពន្យល់មេដឹកនាំសហភាពអឺរ៉ុបអំពីដំណើរទស្សនកិច្ចរបស់លោកទៅកាន់ទីក្រុងវ៉ាស៊ីនតោននៅក្នុងសន្និសីទតាមវីដេអូរយៈពេល ៣០ នាទីដែលបានកោះប្រជុំភ្លាមៗ។

អ្នកការទូតសហភាពអឺរ៉ុបម្នាក់បាននិយាយថា លោក Macron បានបញ្ជាក់ថាលោក Trump ពុំបានផ្តល់ការសន្យាច្បាស់លាស់ណាមួយទាក់ទងនឹងដំណើររបស់លោកនោះទេ។ ដូច្នេះ ប្រាកដណាស់ ភាពមិនច្បាស់លាស់ជាយុទ្ធសាស្ត្រលើបញ្ហានេះនៅតែមាន។

ទោះបីជាសហរដ្ឋអាមេរិក និងរុស្ស៊ី កំពុងពិភាក្សាគ្នាដើម្បីបញ្ចប់សង្គ្រាមដោយគ្មានវត្តមានទីក្រុង Kyiv និងអឺរ៉ុបក៏ដោយ រដ្ឋធានីនានារួមទាំងទីក្រុងប៉ារីស និងទីក្រុងឡុងដ៍ កំពុងព្យាយាមបង្កើតបេសកកម្មរក្សាសន្តិភាពសម្រាប់អ៊ុយក្រែន ប្រសិនបើមានកិច្ចព្រមព្រៀង។

ការធានាសន្តិសុខសម្រាប់អ៊ុយក្រែនក្នុងការទប់ស្កាត់ការវាយប្រហាររបស់រុស្ស៊ីមួយផ្សេងទៀតគឺជាបញ្ហាសំខាន់មួយ ដោយនាយករដ្ឋមន្ត្រីចក្រភពអង់គ្លេស លោក Keir Starmer និងប្រធានាធិបតីអ៊ុយក្រែនលោក Volodymyr Zelenskyy គ្រោងធ្វើដំណើរទៅកាន់ទីក្រុងវ៉ាស៊ីនតោនក្នុងសប្តាហ៍នេះ ដោយមានគោលបំណងរួមគ្នានៃការបញ្ចប់ជម្លោះ និងទទួលបានការសន្យាផ្នែកយោធាពីសហរដ្ឋអាមេរិក។យ៉ាងណាក៏ដោយ លោក Trump ពុំបានបង្ហាញចំណាប់អារម្មណ៍ក្នុងការអុញ្ញាតឲ្យមេដឹកនាំសហភាពអឺរ៉ុបណាមួយចូលរួមក្នុងការចរចាដែលកំពុងដំណើរការជាមួយរុស្ស៊ីនោះទេ៕