ប្រជាជនអ៊ីស្រាអែល កាន់ទុក្ខគ្រួសារដែលបានតំណាងឲ្យការរងរបួសដែលប្រទេសរបស់ពួកគេ បានទទួលរង ក្នុងការវាយប្រហារដឹកនាំដោយក្រុមហាម៉ាស កាលពីថ្ងៃទី៧ ខែតុលា ឆ្នាំ២០២៣ ខណៈក្រុមសកម្មប្រយុទ្ធប៉ាឡេស្ទីន បានព្រមព្រៀងប្រគល់សាកសពចំណាប់ថ្នូរចុងក្រោយ ដែលរួមទាំងនៅក្នុងដំណាក់កាលដំបូងនៃបទឈប់បាញ់ នៅតំបន់ហ្កាហ្សា។

ក្រុមហាម៉ាស បាននិយាយថាសាកសព ៤នាក់ ត្រូវបានប្រគល់កាលពីយប់ថ្ងៃពុធ ទី២៦ ខែកុម្ភៈហើយបាននិយាយបន្ថែមថា មន្ទីរពេទ្យមួយនៅតំបន់ហ្កាហ្សា កំពុងត្រៀមទទួលអ្នកទោសប៉ាឡេស្ទីនដែលនឹងត្រូវបានដោះលែងជាថ្នូរ។

ខុទ្ធការល័យរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា កិច្ចព្រមព្រៀងមួយត្រូវបានឈានដល់ សម្រាប់ការប្រគល់សាកសពចំណាប់ថ្នូរបួននាក់ដែលបានស្លាប់។

សេចក្តីសម្រេចនេះ បានធ្វើឡើងនៅថ្ងៃតែមួយជាមួយនឹងពិធីបុណ្យសពរបស់គ្រួសារលោក Bibas បន្ទាប់ពីការប្រគល់សាកសព Kfir Bibas អាយុប្រាំបួនខែ Arielបងប្រុសអាយុ៤ឆ្នាំ និងម្តាយរបស់ពួកគេអ្នកស្រី Shiri កាលពីសប្តាហ៍មុន។

ចំណាប់ថ្នូរវ័យក្មេងបំផុតដែលត្រូវបានចាប់ខ្លួន ក្នុងអំឡុងពេលការវាយប្រហារលើអ៊ីស្រាអែលដោយក្រុមហាម៉ាសនៅថ្ងៃទី៧ ខែតុលាឆ្នាំ២០២៣ ត្រូវបានសម្លាប់ បន្ទាប់ពីពួកគេត្រូវបានចាប់ពង្រត់ចូលទៅក្នុងតំបន់ហ្កាហ្សាស្ទ្រីប។