រដ្ឋបាលរបស់ប្រធានាធិបតីសហរដ្ឋអាមេរិក លោក Donald Trump កាលពីថ្ងៃពុធ ទី២៦ ខែកុម្ភៈ បានបញ្ជាឱ្យទីភ្នាក់ងារសហព័ន្ធ ទទួលយកការកាត់រំសាយបុគ្គលិកសហព័ន្ធទ្រង់ទ្រាយធំបន្ថែមទៀត ខណៈ លោក Elon Musk បានប្តេជ្ញានៅក្នុងកិច្ចប្រជុំគណៈរដ្ឋមន្ត្រីលើកដំបូងរបស់លោក Trump ក្នុងការបន្តកាត់បន្ថយការចំណាយកាន់តែច្រើន។

អនុស្សរណៈ ដែលត្រូវបានចុះហត្ថលេខាដោយនាយកផ្នែកថវិកានៅសេតវិមាន លោក Russell Vought និងប្រធានការិយាល័យគ្រប់គ្រងបុគ្គលិកស្តីទី លោក Charles Ezell បង្ហាញពីការកើនឡើងដ៏ច្រើននៅក្នុងយុទ្ធនាការរបស់លោក Trump និងលោក Musk ដើម្បីកាត់បន្ថយទំហំនៃរដ្ឋាភិបាលសហរដ្ឋអាមេរិក។

រហូតមកដល់ពេលនេះ ការកាត់រំសាយការងារបានផ្តោតសំខាន់ទៅលើបុគ្គលិកដែលធ្វើការសាកល្បង ពុំមានតួនាទីបច្ចុប្បន្ន និងទទួលបានការការពារការងារតិច។

ជុំបន្ទាប់ នឹងផ្តោតលើក្រុមមន្ត្រីរដ្ឋជើងចាស់ដែលមានទំហំច្រើន។ នៅក្នុងកិច្ចប្រជុំគណៈរដ្ឋមន្ត្រី លោក Trump បាននិយាយថា លោក Lee Zeldin អ្នកគ្រប់គ្រងទីភ្នាក់ងារការពារបរិស្ថាន មានផែនការកាត់បន្ថយបុគ្គលិករហូតដល់៦៥ភាគរយនៃបុគ្គលិកជាង១៥.០០០នាក់របស់លោក។