លោក Anwar Gargash ទីប្រឹក្សាការទូតរបស់ប្រធានាធិបតីអារ៉ាប់រួម បាននិយាយកាលពីថ្ងៃពុធថា ផែនការកសាងតំបន់ហ្កាហ្សាឡើងវិញ មិនអាចកើតឡើងដោយគ្មានផ្លូវច្បាស់លាស់ ឆ្ពោះទៅរកដំណោះស្រាយរដ្ឋពីរ សម្រាប់អ៊ីស្រាអែល និងប៉ាឡេស្ទីននោះទេ។

លោកបានបន្ថែមក្នុងសុន្ទរកថានៅក្នុងសន្និសីទ Investopia 2025 នៅទីក្រុងអាប៊ុយដាប៊ី ( Abu Dhabi) ថា ការវិនិយោគលើគម្រោងសាងសង់តំបន់នេះឡើងវិញ នឹងទាមទារឲ្យមានស្ថិរភាពនយោ    បាយ។

លោក Gargash បាននិយាយថា តំបន់ហ្កាហ្សា ត្រូវការផែនការកសាងឡើងវិញ ដែលជាផែនការដ៏ធំមួយ ប៉ុន្តែផែនការកសាងឡើងវិញនេះ ពិតជាមិនអាចកើតឡើង ដោយគ្មានមាគ៌ាច្បាស់លាស់ឈានទៅរក ដំណោះស្រាយរដ្ឋពីរនោះទេ។ ដូច្នេះ ភាពច្បាស់ណាស់នៅទីនេះ គឺអ្នកត្រូវការស្ថិរភាពនយោបាយនៃផែនទីបង្ហាញផ្លូវមួយ ដើម្បីឲ្យការវិនិយោគធំៗទាំងនេះ កើតឡើង»។ 

បណ្តារដ្ឋអារ៉ាប់ កំពុងថ្លឹងថ្លែងអំពីផែនការក្រោយសង្គ្រាមសម្រាប់តំបន់ហ្កាហ្សា ដើម្បីប្រឆាំងនឹងសំណើរបស់ប្រធានាធិបតីអាមេរិក លោក ដូណាល់ ត្រាំ ( Donald Trump) ដើម្បីធ្វើការអភិវឌ្ឍតំបន់នេះឡើងវិញ នៅ ក្រោមការគ្រប់គ្រងរបស់សហរដ្ឋអាមេរិក និង ការជម្លៀសប្រជាជនប៉ាឡេស្ទីនចេញ ជាការរំពឹងទុក ដែលបានធ្វើឲ្យមេដឹកនាំក្នុងតំបន់ខឹងសម្បា។ ប្រភពដែលដឹងពីការពិភាក្សានេះ បាននិយាយថា សំណើភាគច្រើនរបស់អេហ្ស៊ីប អាចរួមបញ្ចូលទឹកប្រាក់ រហូតដល់ ២០ពាន់លានដុល្លារ ជាមូលនិធិ សម្រាប់រយៈពេល ៣ឆ្នាំ ពីតំបន់នេះ។