សមាជិកមួយចំនួននៃក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធ បានសម្តែងការព្រួយបារម្ភចំពោះការប្រកាសរបស់រដ្ឋាភិបាលស្រមោលមួយ ដោយកងកម្លាំងគាំទ្ររហ័សរបស់ស៊ូដង់ ខណៈដែលប្រទេសកេនយ៉ា បានច្រានចោលការចោទប្រកាន់ដែលថា ខ្លួនបានទទួលស្គាល់អង្គភាពនេះ។

ក្រុមឧទ្ទាមនៃកងកម្លាំងយោធាប៉ារ៉ាគាំទ្ររហ័ស (RSF) និងសម្ព័ន្ធមិត្តរបស់ពួកគេដែលបានប្រយុទ្ធជាមួយនឹងកងកម្លាំងរដ្ឋាភិបាលកាលពីថ្ងៃអាទិត្យ បានយល់ព្រមបង្កើតរដ្ឋាភិបាលគូប្រជែងមួយ ដែលបង្កឲ្យមានភាពតានតឹងផ្នែកការទូត រវាងប្រទេសស៊ូដង់ និងកេនយ៉ា។

ភាគីនៃកិច្ចព្រមព្រៀង ដែលបានចុះហត្ថលេខាជាសម្ងាត់ ក្នុងទីក្រុងណៃរ៉ូប៊ី បាននិយាយថា ធម្មនុញ្ញនេះបង្កើត «រដ្ឋាភិបាលសន្តិភាព និងឯកភាពជាតិ» នៅក្នុងតំបន់ដែលគ្រប់គ្រងដោយក្រុមឧទ្ទាមនៃប្រទេសអា  ហ្វ្រិកភាគឦសាន។

តំណាងសហរដ្ឋអាមេរិកលោក John Kelley បានប្រាប់កិច្ចប្រជុំក្រុមប្រឹក្សាសន្តិសុខថា៖«ការប៉ុនប៉ងរបស់កងកម្លាំងយោធាប៉ារ៉ាគាំទ្ររហ័ស (RSF)និងតួអង្គពាក់ព័ន្ធក្នុងការបង្កើតរដ្ឋាភិបាលនេះ នៅក្នុងទឹកដីដែលគ្រប់គ្រងដោយកងកម្លាំង RSF ក្នុងប្រទេសស៊ូដង់ គឺមិនមានប្រយោជន៍សម្រាប់បុព្វហេតុសន្តិភាព និងសន្តិសុខ នៅក្នុងប្រទេសស៊ូដង់ ហើយបង្កហានិភ័យដល់ការធ្វើឲ្យប្រទេសនេះបែកបាក់យ៉ាងពិតប្រាកដ»។

ឯកអគ្គរដ្ឋទូតអង់គ្លេសលោកស្រី Barbara Woodward ក៏បានសម្តែងនូវ«ការព្រួយបារម្ភយ៉ាងខ្លាំង» ចំពោះការបង្កើតរដ្ឋាភិបាលស្រមោលនេះ។