យ៉ាងហោចណាស់មនុស្ស ១២នាក់ ក្នុងនោះមានបុគ្គលិកយោធា និងជនស៊ីវិល ត្រូវបានសម្លាប់ កាលពីថ្ងៃពុធ នៅក្នុងការវាយប្រហារតាមអាកាសរបស់ទួរគី ដោយបានកំណត់គោលដៅទៅលើទីតំបន់ជនបទ Shaddadi នៃខេត្ត Al-Hasakah របស់ប្រទេសស៊ីរី។ នេះបើយោងតាមកងកម្លាំងប្រជាធិបតេយ្យស៊ីរី (SDF) ដែលគាំទ្រដោយសហរដ្ឋអាមេរិក។

នៅក្នុងសេចក្តីថ្លែងការណ៍មួយ កងកម្លាំង SDF បានថ្កោលទោសការវាយប្រហារនេះ ដោយនិយាយថា យន្តហោះចម្បាំងទួរគី និងយានដ្រូន បានវាយប្រហារទីតាំងជាច្រើន រួមទាំងប៉ុស្តិ៍យោធា តំបន់ទីក្រុង និងរថយន្តមួយគ្រឿងដែលដឹកអ្នកគង្វាលចៀម។

SDF បាននិយាយថា ការវាយប្រហារតាមអាកាសចំនួន ១៦លើក ទៅលើតំបន់វាលខ្សាច់ Ruwaishid បានសម្លាប់យុទ្ធជន SDF ចំនួន ៤នាក់ បុគ្គលិកស៊ីវិល ៦នាក់ និងអ្នកគង្វាលចៀមពីរនាក់។

ការវាយប្រហារតាមអាកាស បានកើតឡើង ចំពេលប្រតិបត្តិការយោធាទួរគី ដែលកំពុងបន្តប្រឆាំងនឹងកងកម្លាំង SDF និងក្រុមពាក់ព័ន្ធ ដែលទីក្រុងអង់ការ៉ា ចាត់ទុកថា ជាផ្នែកបន្ថែមនៃគណបក្សពលករឃើដ (PKK) ជាក្រុមដែលត្រូវបានចាត់ទុក ជាអង្គការភេរវកម្មដោយប្រទេសទួរគី។

រដ្ឋាភិបាលទួរគីមិនទាន់បានធ្វើអត្ថាធិប្បាយលើការវាយប្រហារចុងក្រោយនេះ នៅឡើយទេ ប៉ុន្តែទីក្រុងអង់ការ៉ា បានប្តេជ្ញាម្តងហើយម្តងទៀតថា នឹងបន្តប្រតិបត្តិការយោធានៅភាគខាងជើងប្រទេសស៊ីរី ដោយកំណត់គោលដៅលើតំបន់ដែលគ្រប់គ្រងដោយកងកម្លាំង SDF និងអះអាងថា នឹងទប់ស្កាត់ការគំរាមកំហែងដល់សន្តិសុខជាតិរបស់ខ្លួន។