គណៈកម្មការអឺរ៉ុប កាលពីថ្ងៃពុធ (ទី២៦ ខែកុម្ភៈ) បានប្រាប់ឲ្យដឹងថា ខ្លួននឹងឆ្លើយតបវិញ «យ៉ាងម៉ឺងម៉ាត់ និងឆាប់រហ័ស ប្រឆាំងនឹងការមាននូវរបាំងមិនសមហេតុផល ចំពោះពាណិជ្ជកម្មសេរី និងយុត្តិធម៌» បន្ទាប់ពីប្រធានាធិបតីអាមេរិក លោក Donald Trump បាននិយាយថា រដ្ឋបាលរបស់លោក នឹងប្រកាសពន្ធ ២៥ភាគរយលើការនាំចូលពីសហភាពអឺរ៉ុប (EU) ឆាប់ៗនេះ។

អំឡុងការឆ្លើយតបទៅនឹងសំណើសុំការអត្ថាធិប្បាយ ចំពោះការកត់សម្គាល់របស់លោក Trump អ្នកនាំពាក្យគណៈកម្មាការ បាននិយាយថា៖ «សហភាពអឺរ៉ុប នឹងតបតវិញយ៉ាងម៉ឺងម៉ាត់ និងឆាប់រហ័ស ប្រឆាំងនឹងការមាននូវរបាំងមិនសមហេតុផល ចំពោះពាណិជ្ជកម្មសេរី និងយុត្តិធម៌ ក្នុងនោះរួមទាំងពេលដែលការដំឡើងពន្ធ ត្រូវបានប្រើប្រាស់ ដើម្បីប្រកួតប្រជែងនឹងគោលនយោបាយស្របច្បាប់ និងមិនមានការរើសអើងផងដែរ»។

ជាមួយគ្នានេះ នៅក្នុងសេចក្តីថ្លែងការណ៍តាមអ៊ីម៉ែល អ្នកនាំពាក្យបានឲ្យដឹងបន្ថែមថា៖ «សហភាពអឺរ៉ុប នឹងតែងតែការពារអាជីវកម្ម បុគ្គលិក និងអ្នកប្រើប្រាស់អឺរ៉ុប ពីការយកពន្ធមិនសមហេតុផល»។

គួរបញ្ជាក់ថា អំឡុងកិច្ចប្រជុំគណៈរដ្ឋមន្ត្រី នៅពេលត្រូវបានសួរថា តើលោកបានសម្រេចហើយ ឬនៅ ពាក់ព័ន្ធនឹងអត្រាពន្ធ សម្រាប់ទំនិញនាំចូលពី EU លោក Trump បានឆ្លើយតបថា៖ «យើងបានសម្រេចរួចហើយ យើងនឹងប្រកាសពីវា ក្នុងពេលឆាប់ៗនេះ ហើយនិយាយជាទូទៅ វានឹងមានកម្រិត ២៥ភាគរយ ហើយកម្រិតនោះនឹងផ្ដោតលើរថយន្ត និងទំនិញផ្សេងៗទៀត»។

ហើយលើសពីនោះទៀត លោកក៏បានលើកឡើងថា EU ត្រូវបានបង្កើតឡើងក្នុងគោលបំណងធ្វើឲ្យសហរដ្ឋអាមេរិកខាតបង់។ តែជាការឆ្លើយតបទៅនឹងការកត់សម្គាល់នោះ អ្នកនាំពាក្យគណៈកម្មការអឺរ៉ុប បានប្រាប់ថា «EU គឺជាទីផ្សារសេរីដ៏ធំបំផុតរបស់ពិភពលោក។ ហើយវាជាប្រយោជន៍ សម្រាប់សហរដ្ឋអាមេរិក»៕