នាយករដ្ឋមន្ត្រីអង់គ្លេស លោក Keir Starmer កាលពីថ្ងៃពុធ (ទី២៦ ខែកុម្ភៈ) បានជំរុញឲ្យសហរដ្ឋអាមេរិកផ្តល់នូវ «ការគាំទ្រ» ផ្នែកសន្តិសុខ ជុំវិញលទ្ធភាពនៃការមានកងរក្សាសន្តិភាពអឺរ៉ុប នាពេលអនាគត នៅប្រទេសអ៊ុយក្រែន ដោយត្រឹមតែនិយាយថា វានឹងផ្តល់ឲ្យទីក្រុងគីវនូវសន្តិភាពយូរអង្វែង ជាជាងការមានបទឈប់បាញ់បណ្តោះអាសន្ន។

ដោយកំពុងធ្វើដំណើរឆ្ពោះទៅកាន់ទីក្រុងវ៉ាស៊ីនតោន ដើម្បីជួបជាមួយប្រធានាធិបតីអាមេរិក លោក Donald Trump លោក Starmer ជាថ្មីម្ដងទៀទ បាននិយាយថា ចក្រភពអង់គ្លេសនឹងរួមចំណែករបស់ខ្លួន ក្នុងតួនាទីរក្សាសន្តិភាពណាមួយ នៅអ៊ុយក្រែន ប៉ុន្តែអាចធ្វើទៅបាន លុះត្រាណាតែមានការជួយគាំទ្រពីសហរដ្ឋអាមេរិកប៉ុណ្ណោះ។

គួរបញ្ជាក់ថា ចាប់តាំងពីលោក Trump បានបោះបង់ចោលវិធីសាស្រ្តកាន់តែផ្ដល់ភាពមានប្រៀបដល់អ៊ុយក្រែនរបស់ទីក្រុងវ៉ាស៊ីនតោន ចំពោះសង្រ្គាមរបស់រុស្ស៊ី ចក្រភពអង់គ្លេស និងបណ្តាប្រទេសនៅអឺរ៉ុបផ្សេងទៀត បានប្រញាប់ប្រញាល់បង្ហាញនូវរណសិរ្សរួបរួមមួយ និងបង្កើនកិច្ចប្រឹងប្រែងការទូត ដើម្បីគាំទ្រដល់ទីក្រុងគីវ។

ប៉ុន្តែនៅតែមានការខ្វែងគំនិតគ្នា ជុំវិញការដាក់ពង្រាយទ័ព នាពេលអនាគត ក្នុងប្រទេសអ៊ុយក្រែន ដោយប្រទេសអឺរ៉ុបមួយចំនួន ក្នុងនោះរួមទាំងបារាំងបានត្រៀមរួចជាស្រេច ក្នុងការធ្វើដូច្នេះ ខណៈដែលប្រទេសផ្សេងទៀត ដូចជាប៉ូឡូញជាដើម បានច្រានចោល។ នៅថ្ងៃទី២៦ ខែកុម្ភៈ រុស្ស៊ី ជាថ្មីម្ដងទៀត បានប្រាប់ថា ខ្លួនមិនអាចពិចារណានូវ «ជម្រើសណាមួយ» ដើម្បីឲ្យកងរក្សាសន្តិភាពអឺរ៉ុបត្រូវបានបញ្ជូនទៅអ៊ុយក្រែនឡើយ។

សម្រាប់លោក Starmer ផ្នែកដ៏សំខាន់នៃផែនការ ដើម្បីមានកិច្ចព្រមព្រៀងសន្តិភាពអ៊ុយក្រែន គឺការធានានូវអ្វីដែលលោកហៅថា «ការគាំទ្រ» ពីលោក Trump ជាអ្វីដែលមិនទាន់ត្រូវបានកំណត់ច្បាស់លាស់នៅឡើយទេ៕