ប្រធានាធិបតីអាមេរិក លោក Donald Trump កាលពីថ្ងៃពុធ (ទី២៦ ខែកុម្ភៈ) បាននិយាយថា លោកកំពុងលុបចោលអាជ្ញាបណ្ណដែលផ្តល់ទៅឲ្យក្រុមហ៊ុន Chevron ដើម្បីប្រតិបត្តិការនៅប្រទេសវេណេហ្ស៊ុយអេឡា ដោយអ្នកកាន់តំណែងមុនរបស់លោក គឺលោក Joe Biden កាលពីជាង ២ឆ្នាំមុន ដោយចោទប្រកាន់ប្រធានាធិបតី លោក Nicolas Maduro ថា មិនបានធ្វើឲ្យមានការរីកចម្រើន លើកំណែទម្រង់ការបោះឆ្នោត និងការវិលត្រលប់របស់ជនអន្តោប្រវេសន៍។

តាមរយៈការបង្ហោះ នៅលើបណ្ដាញសង្គម Truth Social លោក Trump បានប្រាប់ថា លោកកំពុង «លុបចោលសម្បទាន» នៃ «កិច្ចព្រមព្រៀងប្រតិបត្តិការប្រេង ចុះនៅថ្ងៃទី២៦ ខែវិច្ឆិកា ឆ្នាំ០២២»។

លោក Trump មិនបានបញ្ចេញឈ្មោះក្រុមហ៊ុន Chevron នៅក្នុងការអត្ថាធិប្បាយរបស់លោកទេ ប៉ុន្តែទីក្រុងវ៉ាស៊ីនតោន បានផ្តល់អាជ្ញាបណ្ណដល់ក្រុមហ៊ុន Chevron ដើម្បីប្រតិបត្តិការ ក្នុងវិស័យប្រេងរបស់ប្រទេសវេណេហ្ស៊ុយអេឡា នៅថ្ងៃទី២៦ ខែវិច្ឆិកា ឆ្នាំ០២២។ នោះគឺជាអាជ្ញាបណ្ណតែមួយគត់ដែលរដ្ឋបាលបានចេញ សម្រាប់វេណេហ្ស៊ុយអេឡា នាថ្ងៃនោះ។

ក្រុមហ៊ុន Chevron បានឲ្យដឹងថា ខ្លួនបានដឹងពីការបង្ហោះរបស់លោក Trump ហើយកំពុងពិចារណាផលប៉ះពាល់ពីចំណាត់ការនេះ។ ក្រុមហ៊ុន Chevron នាំចេញប្រេងឆៅប្រហែល ២៤០.០០០បារ៉ែល ក្នុងមួយថ្ងៃ ពីប្រតិបត្តិការរបស់ខ្លួន នៅវេណេហ្ស៊ុយអេឡា ពោលគឺលើសពី ១ភាគ៤ នៃទិន្នផលប្រេងរបស់ប្រទេសនេះទាំងមូល។

ការបញ្ចប់អាជ្ញាបណ្ណនេះ មានន័យថា ក្រុមហ៊ុន Chevron នឹងមិនអាចនាំចេញប្រេងឆៅពីប្រទេសវេណេហ្ស៊ុយអេឡា បានទៀតទេ។ ហើយប្រសិនបើក្រុមហ៊ុនប្រេងរដ្ឋរបស់វេណេហ្ស៊ុយអេឡា PDVSA នាំចេញប្រេងដែលត្រូវបាននាំចេញកាលពីមុនដោយក្រុមហ៊ុន Chevron នោះ រោងចក្រចម្រាញ់ប្រេងរបស់សហរដ្ឋអាមេរិក នឹងមិនអាចទិញវាបានឡើយ ដោយសារទណ្ឌកម្មរបស់អាមេរិក៕