អ្នកនាំពាក្យក្រសួងការពារជាតិ នៅថ្ងៃព្រហស្បតិ៍ (ទី២៧ ខែកុម្ភៈ) នេះ បានប្រាប់ឲ្យដឹងថា សមយុទ្ធបាញ់គ្រាប់ពិតថ្មីៗនេះរបស់កងទ័ពជើងទឹកចិន នៅសមុទ្រ Tasman (Tasman Sea) ដែលស្ថិតនៅចន្លោះរវាងប្រទេសអូស្ត្រាលី និងនូវែលសេឡង់ គឺ «ស្របតាមច្បាប់អន្តរជាតិទាំងស្រុង»។

ការអត្ថាធិប្បាយបែបនេះរបស់អ្នកនាំពាក្យក្រសួង លោក Wu Qian នៅឯសន្និសីទសារព័ត៌មាន ក្នុងទីក្រុងប៉េកាំង កើតឡើងបន្ទាប់ពីមាននូវក្ដីបារម្ភពីមន្ត្រីនៃប្រទេសទាំង២ ដែលថា ពួកគេមិនទទួលបានការព្រមានគ្រប់គ្រាន់ អំពីសមយុទ្ធនៅក្នុងដែនទឹកអន្តរជាតិ ដែលបង្ខំឲ្យក្រុមហ៊ុនអាកាសចរណ៍ពាណិជ្ជកម្មបង្វែរជើងហោះហើរ។

សេចក្ដីរាយការណ៍ នៅក្នុងប្រព័ន្ធផ្សព្វផ្សាយរដ្ឋរបស់ចិន ក្នុងសប្តាហ៍នេះ បានបញ្ជាក់អំពីវត្តមានរបស់នាវាចំនួន ៣គ្រឿង រួមមាននាវាពិឃាត Type 055 នាវាចម្បាំង Type 054 និងនាវាផ្ដល់ជំនួយផ្គត់ផ្គង់ នៅក្នុងសមុទ្រ Tasman ។

ទំហំនៃការធ្វើសមយុទ្ធនេះទាំងស្រុង មិនត្រូវបានគេដឹងនោះទេ ប៉ុន្តែសារព័ត៌មាន Global Times ដែលគាំទ្រដោយរដ្ឋ បានបង្ហោះរូបភាពនៃនាវាពិឃាត Type 055 ដែលជានាវាកងទ័ពជើងទឹកទំនើបបំផុតរបស់ប្រទេសចិន កំពុងបាញ់កាំភ្លើង ដែលបញ្ឈរនៅជាន់របស់នាវានេះ៕