អាកាសយានដ្ឋាន នៅទីក្រុង Munich និង Hamburg របស់ប្រទេសអាល្លឺម៉ង់ បានរងប៉ះពាល់ដោយកូដកម្មរបស់សហជីពវិស័យសាធារណៈ Verdi ចំនួន ២ថ្ងៃ គឺថ្ងៃព្រហស្បតិ៍ (ទី២៧ ខែកុម្ភៈ) និងថ្ងៃសុក្រ (ទី២៨ ខែកុម្ភៈ) ដោយក្រុមហ៊ុនអាកាសចរណ៍បានលុបចោលជើងហោះហើរប្រហែល ៨០ភាគរយ នៅទីក្រុង Munich ។

តាមរយៈសេចក្តីថ្លែងការណ៍ នៅលើគេហទំព័ររបស់ខ្លួន ទីក្រុង Munich ដែលជាមជ្ឈមណ្ឌលធំជាងគេទី២ របស់អាល្លឺម៉ង់ បានឲ្យដឹងថា មានហានិភ័យ ដែលថា ជើងហោះហើរកាន់តែច្រើនបន្ថែមទៀត អាចត្រូវបានលុបចោល និងថា អ្នកដំណើរដែលមានគម្រោងធ្វើដំណើរឆ្លងកាត់ទីក្រុង Munich គួរតែទាក់ទងក្រុមហ៊ុនអាកាសចរណ៍របស់ពួកគេ។

សហជីព Verdi បានឈប់ធ្វើការ ដើម្បីតវ៉ាជាច្រើនដង នៅអាល្លឺម៉ង់ ចាប់តាំងពីការចរចា ពាក់ព័ន្ធនឹងប្រាក់ខែ បានចាប់ផ្តើមឡើង ក្នុងខែមករា។ សហជីពបានប្រាប់ថា បុគ្គលិកនៅប្រតិបត្តិករអាកាសយានដ្ឋាន Hamburg ក៏ដូចជាផ្នែកសេវាកម្មនានា ដែលរួមមានទាំងផ្នែកថែទាំ បច្ចេកវិទ្យាព័ត៌មានវិទ្យា សន្តិសុខ និងការគ្រប់គ្រងអីវ៉ាន់ នឹងមិនចូលធ្វើការនោះទេ ក្នុងអំឡុងពេល ២ថ្ងៃ។

សមាគមអាកាសយានដ្ឋានអាល្លឺម៉ង់ ADV បានឲ្យដឹងថា កូដកម្ម ក៏ដូចជាការមិនព្រមចូលធ្វើការស្រដៀងគ្នា នៅអាកាសយានដ្ឋាន ក្នុងទីក្រុង Duesseldorf និង Cologne កាលពីដើមសប្តាហ៍នេះ កំពុងរំខានដល់ផែនការធ្វើដំណើររបស់អ្នកដំណើរជិត ៣០០.០០០នាក់៕