ស៊ូដង់៖ ក្រុមអ្នកតវ៉ាដែលមិនពេញចិត្តចំពោះកិច្ចព្រមព្រៀង ដែលបានឈានដល់ការឯកភាពគ្នាក្នុងការអនុញ្ញាតឲ្យនាយករដ្ឋមន្ត្រី ដែលត្រូវបានបណ្ដេញចេញពីតំណែងបានឡើងកាន់អំណាចឡើងវិញ បានបន្តប៉ះទង្គិចជាមួយនគរបាលក្នុងរដ្ឋធានី Khartoum កាលពីថ្ងៃអាទិត្យ។ លោក Abdalla Hamdok បានចុះហត្ថលេខាជាមួយយោធាកាលពីថ្ងៃអាទិត្យ ដែលនឹងមើលឃើញលោកកាន់អំណាចជាថ្មីរយៈពេលជិត ១ខែបន្ទាប់ពីរដ្ឋប្រហារយោធាដែលឈានដល់ការចាប់ខ្លួនរូបលោកឃុំនៅក្នុងផ្ទះ។
ក្រុមគាំទ្រលទ្ធិប្រជាធិបតេយ្យដ៏សំខាន់ដែលបានបង្កើតការតវ៉ារាប់សិបលើក បានទាត់ចោលកិច្ចព្រមព្រៀងដែលពួកគេចាត់ទុកថា ជាទម្រង់នៃអំពើក្បត់។ ឧត្ដមសេនីយ៍ជាន់ខ្ពស់របស់ប្រទេសនេះគឺលោក Abdel Fattah Burhan បាននិយាយនៅក្នុងសេចក្ដីថ្លែងការណ៍តាមកញ្ចក់ទូរទស្សន៍ថា លោក Hamdok នឹងដឹកនាំគណៈរដ្ឋមន្ត្រីតាមបច្ចេកវិទ្យាឯករាជ្យ រហូតដល់ពេលវេលាណាមួយដែលអាចរៀបចំការបោះឆ្នោតបាន។ គេនៅតែមិនទាន់ដឹងច្បាស់ថា តើរដ្ឋាភិបាលមួយនេះនឹងក្ដាប់អំណាចបានច្រើនប៉ុណ្ណា។ រដ្ឋាភិបាលមួយនេះនៅតែស្ថិតក្នុងកណ្ដាប់ដៃរបស់យោធានៅឡើយ។ យោងតាមសារព័ត៌មាន Reuters ក្រុមគ្រូពេទ្យបាននិយាយថា កងកម្លាំងសន្តិសុខបានបាញ់សម្លាប់មនុស្សយ៉ាងហោចណាស់ ១៥នាក់ និងរាប់សិបនាក់រងរបួស ខណៈពលរដ្ឋស៊ូដង់រាប់ពាន់នាក់ចេញតវ៉ានៅតាមដងផ្លូវនានាកាលពីថ្ងៃពុធសប្ដាហ៍មុន ជាថ្ងៃដ៏ធ្ងន់ធ្ងរបំផុតក្នុងរយៈពេល ១ខែនៃការតវ៉ាប្រឆាំងនឹងរបបដឹកនាំដោយយោធា៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
