ប្រធានាធិបតីអាហ្រ្វិកខាងត្បូង លោក Cyril Ramaphosa នៅថ្ងៃព្រហស្បតិ៍ (ទី២៧ ខែកុម្ភៈ) នេះ បាននិយាយថា លោកចង់ «មានកិច្ចព្រមព្រៀង» ជាមួយប្រធានាធិបតីអាមេរិក លោក Donald Trump ដើម្បីដោះស្រាយជម្លោះ ជុំវិញគោលនយោបាយដីធ្លីរបស់ប្រទេស និងសំណុំរឿងប្រល័យពូជសាសន៍ ប្រឆាំងនឹងអ៊ីស្រាអែល នៅតុលាការពិភពលោក។

គួររំលឹកថា លោក Trump បានកាត់បន្ថយជំនួយហិរញ្ញវត្ថុរបស់សហរដ្ឋអាមេរិក ចំពោះអាហ្វ្រិកខាងត្បូង នៅក្នុងក្រឹត្យមួយ នៅខែនេះ ដោយលើកឡើងពីការមិនយល់ស្រប ចំពោះវិធីសាស្រ្តរបស់ប្រទេសនេះ ចំពោះកំណែទម្រង់ដីធ្លី និងសំណុំរឿង នៅឯតុលាការយុត្តិធម៌អន្តរជាតិ (ICJ) ប្រឆាំងនឹងសម្ព័ន្ធមិត្តជិតស្និទ្ធរបស់ទីក្រុងវ៉ាស៊ីនតោន គឺអ៊ីស្រាអែល។

នៅឯសន្និសីទដែលរៀបចំឡើងដោយធនាគារអាមេរិក Goldman Sachs ក្នុងទីក្រុង Johannesburg លោក Ramaphosa បានប្រាប់ថា លោកចង់ឲ្យ «បញ្ហាតានតឹងធូរស្រាលបន្តិច» បន្ទាប់ពីមានក្រឹត្យនោះ ប៉ុន្តែគោលដៅវែងឆ្ងាយ គឺធ្វើដំណើរទៅទីក្រុងវ៉ាស៊ីនតោន ដើម្បីផ្សះផ្សាទំនាក់ទំនង។

លោក Ramaphosa បាននិយាយថា៖ «យើងមិនចង់ធ្វើដំណើរទៅ ហើយពន្យល់ពីខ្លួនយើងនោះទេ។ យើងចង់ទៅ និងឈានកិច្ចព្រមព្រៀងដ៏មានអត្ថន័យជាមួយសហរដ្ឋអាមេរិក លើគ្រប់បញ្ហាទាំងអស់។ ខ្ញុំមានទំនោរជាវិជ្ជមានខ្លាំង ក្នុងការលើកកម្ពស់ទំនាក់ទំនងដ៏ល្អជាមួយលោកប្រធានាធិបតី Trump»។

តែយ៉ាងណាក្ដី លោក Ramaphosa មិនបាននិយាយថា តើកិច្ចព្រមព្រៀងនេះអាចពាក់ព័ន្ធនឹងអ្វីនោះទេ ដោយគ្រាន់តែប្រាប់ថា វាអាចផ្ដោតលើបញ្ហាពាណិជ្ជកម្ម ការទូត និងនយោបាយ៕