បើយោងតាមរបាយការណ៍ចេញផ្សាយ នៅថ្ងៃព្រហស្បតិ៍ (ទី២៧ ខែកុម្ភៈ) ដែលតាមដានការស្លាប់ នៅទីកន្លែងដែលត្រូវបានសង្ស័យជាផ្នូរចំនួន៧ បានបង្ហាញថា ជនជាតិស៊ីរីជាង ១.០០០នាក់ បានបាត់បង់ជីវិត អំឡុងការឃុំឃាំង នៅឯអាកាសយានដ្ឋានយោធាមួយនៅជាយក្រុងដាម៉ាស ដោយពួកគេត្រូវបានសម្លាប់ ដោយការប្រហារជីវិត ការធ្វើទារុណកម្ម ឬការធ្វើទុក្ខបុកម្នេញ។

នៅក្នុងរបាយការណ៍ដែលត្រូវបានចែករំលែកផ្តាច់មុខជាមួយសារព័ត៌មាន Reuters មជ្ឈមណ្ឌលយុត្តិធម៌ និងគណនេយ្យភាពស៊ីរី (SJAC) បានឲ្យដឹងថា ខ្លួនបានកំណត់ទីតាំងផ្នូរ ដោយប្រើប្រាស់ការរួមបញ្ចូលគ្នានៃសក្ខីកម្មសាក្សី រូបភាពផ្កាយរណប និងឯកសារដែលថតនៅអាកាសយានដ្ឋានយោធា ក្នុងតំបន់ Mezzeh ជាយក្រុងដាម៉ាស បន្ទាប់ពីប្រធានាធិបតី Bashar al-Assad បានធ្លាក់ពីអំណាច ក្នុងខែធ្នូឆ្នាំមុន។ កន្លែងខ្លះស្ថិតនៅលើដីរបស់អាកាសយានដ្ឋាន។ កន្លែងផ្សេងទៀត មាននៅកន្លែងខុសៗគ្នា ទូទាំងទីក្រុងដាម៉ាស។.

យ៉ាងណាក្ដី សារព័ត៌មាន Reuters មិនបានត្រួតពិនិត្យឯកសារនេះទេ ហើយមិនអាចបញ្ជាក់ដោយឯករាជ្យ អំពីភាពពិតប្រាកដជាក់លាក់នៃផ្នូរដ៏ធំទាំងនេះ តាមរយៈការពិនិត្យមើលរូបភាពផ្កាយរណបដោយផ្ទាល់នោះឡើយ។ ប៉ុន្តែអ្នកសារព័ត៌មានរបស់ទីភា្នក់ងារសារព័ត៌មាន Reuters ពិតជាបានឃើញសញ្ញានៃដីរញ៉េរញ៉ៃ ក្នុងរូបភាពនៃកន្លែងជាច្រើនដែលត្រូវបានបង្ហាញដោយ SJAC។ 

ទីតាំងចំនួន២ ដែលកន្លែងមួយ នៅអាកាសយានដ្ឋាន Mezzeh និងមួយទៀត នៅទីបញ្ចុះសព ក្នុងតំបន់ Najha បង្ហាញឲ្យឃើញសញ្ញាយ៉ាងច្បាស់ពីលេណដ្ឋានវែងៗ ដែលត្រូវបានជីកក្នុងអំឡុងពេលស្របនឹងសក្ខីកម្មសាក្សីពី SJAC៕