ប្រព័ន្ធផ្សព្វផ្សាយរដ្ឋបាននិយាយនៅថ្ងៃសុក្រ (២៨ កុម្ភៈ) នេះថា មេដឹកនាំកូរ៉េខាងជើង លោក Kim Jong Un បានត្រួតពិនិត្យការបាញ់សាកល្បងមីស៊ីលតម្រង់គោលដៅយុទ្ធសាស្ត្រ និងបានបញ្ជាឱ្យត្រៀមខ្លួនពេញលេញក្នុងការប្រើប្រាស់សមត្ថភាពវាយប្រហារនុយក្លេអ៊ែរ ដែលនឹងធានាបាននូវការការពារប្រកបដោយប្រសិទ្ធភាពបំផុតសម្រាប់ប្រទេសនេះ។

ទីភ្នាក់ងារសារព័ត៌មាន KCNA បានរាយការណ៍ថា ការធ្វើតេស្តមីស៊ីលនេះត្រូវបានរៀបចំឡើងដើម្បីព្រមាន "ខ្មាំងសត្រូវដែលកំពុងរំលោភបំពានយ៉ាងធ្ងន់ធ្ងរដល់បរិស្ថានសន្តិសុខនៃកូរ៉េខាងជើង និងជំរុញ ព្រមទាំងបង្កើនបរិយាកាសប្រឈមមុខដាក់គ្នា" ហើយដើម្បីបង្ហាញពី "ការត្រៀមខ្លួននៃមធ្យោបាយប្រតិបត្តិការនុយក្លេអ៊ែរផ្សេងៗ"។ 

ប្រព័ន្ធផ្សព្វផ្សាយនេះបន្តថា “ការសាកល្បងអាវុធនោះគឺជាបេសកកម្ម និងកាតព្វកិច្ចប្រកបដោយការទទួលខុសត្រូវរបស់កងកម្លាំងប្រដាប់អាវុធនុយក្លេអ៊ែរកូរ៉េខាងជើង ដើម្បីការពារជាអចិន្ត្រៃយ៍នូវអធិបតេយ្យភាព និងសន្តិសុខជាតិ ជាមួយនឹងខែលនុយក្លេអ៊ែរដែលអាចទុកចិត្តបាន ដោយកម្លាំងនុយក្លេអ៊ែរត្រូវត្រៀមខ្លួនប្រយុទ្ធឱ្យបានហ្មត់ចត់បន្ថែមទៀត និងការត្រៀមលក្ខណៈពេញលេញសម្រាប់ការប្រើប្រាស់សព្វាវុធទាំងនោះ"។

ការបាញ់បង្ហោះមីស៊ីលតម្រង់គោលដៅនេះ ត្រូវបានធ្វើឡើងកាលពីថ្ងៃពុធសប្ដាហ៍នេះ នៅលើសមុទ្រនៃឆ្នេរសមុទ្រភាគខាងលិចឧបទ្វីបកូរ៉េ។ មីស៊ីលប្រភេទនេះមិនសូវនាំមកនូវការជូនដំណឹង និងការថ្កោលទោសពីសហគមន៍អន្តរជាតិ ដូចមីស៊ីលបាលីស្ទិកទេ ព្រោះមីស៊ីលតម្រង់គោលដៅមិនត្រូវបានហាមឃាត់ជាផ្លូវការនៅក្រោសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិឡើយ៕