នាយករដ្ឋមន្ត្រីអង់គ្លេស លោក Keir Starmer បានព្រមានថា កិច្ចព្រមព្រៀងស្តីពីអ៊ុយក្រែន មិនអាច "ផ្តល់រង្វាន់ដល់អ្នកវាយលុកឡើយ" អំឡុងជំនួបជាមួយប្រធានាធិបតីអាមេរិក Donald Trump ដែលបានងាកទៅរកប្រទេសរុស្ស៊ី។

លោក Starmer បានប្រាប់សន្និសីទសារព័ត៌មានរួមគ្នាថា "យើងត្រូវតែឈ្នះទទួលបានសន្តិភាព ហើយនោះជាអ្វីដែលយើងត្រូវធ្វើនៅពេលនេះ ព្រោះមិនអាចជាសន្តិភាពដែលផ្តល់រង្វាន់ដល់អ្នកធ្វើសង្រ្គាម ឬផ្តល់ការលើកទឹកចិត្តដល់របបដូចជាអ៊ីរ៉ង់" នោះឡើយ ។

ជាមួយគ្នានោះលោក Trump បានប្រាប់សន្និសីទសារព័ត៌មានថា កិច្ចព្រមព្រៀងសន្តិភាពចាំបាច់ត្រូវធ្វើឆាប់ៗ រវាងអ៊ុយក្រែន និងរុស្ស៊ី ពុំដូច្នេះទេ ប្រហែលជាមិនកើតឡើងឡើយ។

លោក Trump និយាយថារូបលោកទុកចិត្តលោក Putin ខណៈនាយករដ្ឋមន្ត្រីអង់គ្លេសជំរុញការធានាសន្តិសុខអ៊ុយក្រែន។

លោក Starmer បានលើកសរសើរលោក Trump សម្រាប់ការប្តេជ្ញាចិត្តរបស់លោកក្នុងការនាំមកនូវសន្តិភាពក្នុងប្រទេសអ៊ុយក្រែន ហើយបាននិយាយថាចក្រភពអង់គ្លេស ត្រៀមខ្លួនជាស្រេចដើម្បីគាំទ្រកិច្ចព្រមព្រៀងនេះ។ 

លោកបាននិយាយថា យើងកំពុងផ្តោតលើការបញ្ចប់សង្រ្គាមដ៏ព្រៃផ្សៃក្នុងប្រទេសអ៊ុយក្រែន ឥឡូវនេះ។ លោកប្រធានាធិបតី ខ្ញុំសូមស្វាគមន៍ចំពោះការប្តេជ្ញាចិត្តយ៉ាងជ្រាលជ្រៅ និងចេញពីចិត្តរបស់អ្នកក្នុងការនាំមកនូវសន្តិភាព និងការបញ្ឈប់ការសម្លាប់៕