ប្រជាជនស៊ីរីលើសពី ១.០០០នាក់ បានស្លាប់នៅក្នុងការឃុំឃាំងនៅឯអាកាសយានដ្ឋានយោធាមួយកន្លែងនៅជាយក្រុងដាម៉ាស ដែលត្រូវបានសម្លាប់ដោយការប្រហារជីវិត ការធ្វើទារុណកម្ម ឬការធ្វើទុក្ខបុកម្នេញ នៅពន្ធនាគារដែលមនុស្សម្នាខ្លាចរអា នេះបើយោងតាមរបាយការណ៍មួយចេញផ្សាយកាលពីថ្ងៃព្រហស្បតិ៍ (២៧ កុម្ភៈ) សប្ដាហ៍នេះ ដែលតាមដានការស្លាប់ទាំងនោះទៅដល់ផ្នូរសង្ស័យ ៧កន្លែង។

របាយការណ៍នោះបង្ហាញថា មជ្ឈមណ្ឌលយុត្តិធម៌ស៊ីរី បាននិយាយថា ខ្លួនបានកំណត់អត្តសញ្ញាណទីតាំងផ្នូរដោយប្រើការរួមបញ្ចូលគ្នានៃសក្ខីកម្មសាក្សី រូបភាពផ្កាយរណប និងឯកសារថតនៅអាកាសយានដ្ឋានយោធា ដែលមានទីតាំងនៅជាយក្រុងដាម៉ាស នៃតំបន់ Mezzeh បន្ទាប់ពីការទម្លាក់របបលោកប្រធានាធិបតី Bashar al-Assad ក្នុងខែធ្នូ។

លោក Shadi Haroun ដែលជាអ្នកនិពន្ធម្នាក់នៃរបាយការណ៍នេះបាននិយាយថា លោកធ្លាប់ស្ថិតក្នុងចំណោមអ្នកត្រូវឃុំខ្លួនទាំងនោះអស់ជាច្រើនខែក្នុងឆ្នាំ២០១១-២០១២ ដោយសារតែការរៀបចំធ្វើបាតុកម្ម ហើយលោកពណ៌នាថាមានការសួរចម្លើយជាប្រចាំ បូករួមនឹងការធ្វើទារុណកម្មរាងកាយ និងផ្លូវចិត្ត ដែលមានបំណងបង្ខំឱ្យសារភាព។

ប្រជាជនស៊ីរីរាប់សែននាក់ត្រូវប៉ាន់ប្រមាណថាបានស្លាប់ ចាប់តាំងពីឆ្នាំ២០១១មក នៅពេលការបង្រ្កាបរបស់លោក Assad លើការតវ៉ាបានឈានដល់សង្រ្គាមពេញលក្ខណៈ។ អន្តរជាតិបានចោទរបបលោក Assad ពីការសម្លាប់ក្រៅប្រព័ន្ធតុលាការដ៏រីករាលដាល រួមទាំងការប្រហារជីវិតយ៉ាងច្រើននៅក្នុងប្រព័ន្ធពន្ធនាគាររបស់ប្រទេស និងការប្រើប្រាស់អាវុធគីមីប្រឆាំងនឹងប្រជាជនស៊ីរី៕