​ភ្នំពេញ៖ កិច្ចប្រជុំកំពូលថ្នាក់ដឹកនាំវ័យក្មេង នៃមូលនិធិអាស៊ី-អឺរ៉ុបលើកទី៤ បានចាប់ផ្ដើមឡើងនៅថ្ងៃទី ២២ ខែវិច្ឆិកា រហូតដល់ថ្ងៃទី ២៦ ខែវិច្ឆិកាឆ្នាំ ២០២១ខាងមុខ។ កិច្ចប្រជុំនេះជាព្រឹត្តិការណ៍ធំមួយដោយមានការចូលរួមពីថ្នាក់ដឹកនាំ និងវត្តមានយុវជនក្រុមការងារមូលនិធិអាស៊ី-អឺរ៉ុប ប្រមាណ ២០០នាក់ មកពី៥១ប្រទេស ក្នុងតំបន់អាស៊ី-អឺរ៉ុប។

កិច្ចប្រជុំកំពូលថ្នាក់ដឹកនាំវ័យក្មេង នៃមូលនិធិអាស៊ី-អឺរ៉ុបលើកទី៤ ជាព្រឹត្តិការណ៍អមមួយ នៃកិច្ចប្រជុំកំពូលអាស៊ី-អឺរ៉ុបលើកទី១៣ ដែលកម្ពុជាធ្វើជាម្ចាស់ផ្ទះ។ កិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤នេះ ធ្វើឡើងក្រោមមូលបទ «ការអភិវឌ្ឍពិភពលោកប្រកបដោយចីរភាពក្រោយជំងឺកូវីដ-១៩»។

នៅរសៀលថ្ងៃទី២២ ខែវិច្ឆិកា ឆ្នាំ២០២១ នេះ គឺជាថ្ងៃបើកកិច្ចប្រជុំ កិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤ ដែលប្រព្រឹត្តិទៅចាប់ថ្ងៃទី២២ ដល់ថ្ងៃទី២៦ ខែវិច្ឆិកា ឆ្នាំ២០២១។ កម្មវីធីនេះ ស្ថិតក្នុងដំណាក់កាលចុងក្រោយ នៃកម្មវិធីនានារបស់កិច្ចប្រជុំកិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤។

កិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤ ASEFYLS4 ផ្តោតសំខាន់លើសេចក្តីថ្លែងការណ៍របស់យុវជន ក៏ដូចជាវេទិកាជំនួបពិភាក្សារវាងយុវជន និងប្រមុខរដ្ឋ/រដ្ឋាភិបាល ការធ្វើបទបង្ហាញរបស់យុវជនលើ ប្រធានបទនានា និងរបាយការណ៍របស់យុវជនពាក់ព័ន្ធនឹងភាពជាអ្នកដឹកនាំ។

កិច្ចប្រជុំដែលចាប់ផ្ដើមនៅថ្ងៃនេះ រៀបចំឡើងដោយមានការចូលរួមពី ចាប់ផ្ដើមឡើងដោយសុន្ទរកថាស្វាគមន៍របស់ ឯកឧត្ដម Ambassador Toru Morikawa នាយកប្រតិបត្តិនៃមូលនិធិ អាស៊ី-អឺរ៉ុប និងសន្ទរកថាបើកដ៏មានតម្លៃរបស់ ឯកឧត្ដម ហ៊ុន ម៉ានី ប្រធានក្រុមប្រឹក្សាយុវជន អាស៊ី និងជាប្រធានសហភាពសហព័ន្ធយុវជនកម្ពុជា ព្រមទាំងមានការចូលរួមពី ឯកឧត្ដម សុខ សូកេន ប្រធានក្រុមការងារអន្តរក្រសួង-ស្ថាប័ន រៀបចំកិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤ និងថ្នាក់ដឹកនាំ សមាជិកក្រុមការងារអន្តរក្រសួង-ស្ថាប័នជាច្រើនរូប និងយុវជន ASEF សរុបចំនួនប្រមាណ ២០០នាក់ មកពី៥១ប្រទេស ក្នុងតំបន់អាស៊ី-អឺរ៉ុប។

សម្រាប់ការចូលរួមក្នុងកិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤នាថ្ងៃនេះ ឯកឧត្តម ហ៊ុន ម៉ានី ក៏បានបញ្ជាក់ក្នុងទំព័រហ្វេសប៊ុកផ្លូវការរបស់ឯកឧត្តមដែរថា កិច្ចប្រជុំ ដែលចាប់ផ្តើមនារសៀលនេះ បានបង្ហាញពីការតាំងចិត្តយ៉ាងមុតមាំ លើសាមគ្គីភាពរបស់យុវជនក្នុងតំបន់ និងបណ្តាយុវជនលើសកលលោក ហើយក៏ជាវេទិកាដ៏មានឥទ្ធិពលមួយ ដើម្បីផ្សារភ្ជាប់អ្នកដឹកនាំវ័យក្មេងនៃតំបន់អាស៊ី និងអឺរ៉ុប ដើម្បីបន្តរួមគ្នាដោះស្រាយវិបត្តិដែលនានាដែលបាន និងកំពុងកើតឡើង ជាពិសេស រួមគ្នាដោះស្រាយបញ្ហានានាក្នុងបរិបទក្រោយការរីករាលដាលជំងឺកូវីដ១៩។ 

ឯកឧត្តមសង្ឃឹមថា អ្នកដឹកនាំយុវជនវ័យក្មេងទាំងអស់ នឹងយកពុទ្ធិ ចំណេះដឹងបទពិសោធន៍ដែលបានសិក្សារៀនសូត្រពីគ្នាទៅវិញទៅមក ចេញពីកិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤ រួមជាមួយអនុស្សាវីយ៍ល្អៗនៃកម្មវិធីចម្រុះកាលពី១០ខែមុន ដើម្បីបម្រើផលប្រយោជន៍ជាតិរៀងៗខ្លួនប្រកបដោយក្តីមោទនៈ ហើយបន្តរឹតចំណងសាមគ្គីភាព រវាងជាតិ និងប្រជាជននៃតំបន់ទាំងពីរឲ្យបានកាន់តែស្អិតរមួតបន្ថែមទៀត៕ អត្ថបទ៖ គឹមហុក