គណៈប្រតិភូការទូត មកពីសហរដ្ឋអាមេរិក និងរុស្ស៊ី បានជួបពិភាក្សាគ្នានៅទីក្រុងអ៊ីស្តង់ប៊ុល ប្រទេសទួរគី។ ភាគីរុស្ស៊ី បានសម្តែងក្តីសង្ឃឹមថា កិច្ចពិភាក្សានេះនឹងជួយពង្រឹងទំនាក់ទំនងទ្វេភាគី។

ទីភ្នាក់ងារសារព័ត៌មានរដ្ឋ Tass របស់រុស្ស៊ី បានរាយការណ៍ថា កិច្ចប្រជុំនេះបានធ្វើឡើងកាលពីថ្ងៃព្រហស្បតិ៍ នៅឯលំនៅឋានរបស់អគ្គកុងស៊ុលអាមេរិក ស្ថិតនៅទីក្រុងធំបំផុតរបស់ប្រទេសទួរគី។

របាយការណ៍និយាយថា កិច្ចប្រជុំនេះមានរយៈពេលប្រហែល៦ម៉ោងកន្លះ។ តាមសេចក្តីរាយការណ៍ ភាគីទាំងពីរបានពិភាក្សាអំពីវិធីធ្វើឱ្យមានសកម្មភាពប្រក្រតីភាពនៅគ្រឹះស្ថានការទូតរបស់ប្រទេសទាំងពីរ។ កិច្ចពិភាក្សានេះ ធ្វើឡើងបន្ទាប់ពីកិច្ចប្រជុំដែលបានធ្វើឡើងរវាងមន្ត្រីជាន់ខ្ពស់សហរដ្ឋអាមេរិកនិងរុស្ស៊ីនៅប្រទេសអារ៉ាប៊ីសាអ៊ូឌីត កាលពីថ្ងៃទី ១៨ ខែកុម្ភៈ។

ជាក់ស្តែង រុស្ស៊ី បានទទូចថា ខ្លួនចង់ធ្វើឱ្យទំនាក់ទំនងផ្នែកការទូតមានលក្ខណៈជាប្រក្រតីជាមួយសហរដ្ឋអាមេរិក មុនពេលការចរចាស្តីពីបទឈប់បាញ់ដែលអាចកើតមានជាមួយអ៊ុយក្រែន ចាប់ផ្តើម។

ក្រុមអ្នកសង្កេតការណ៍ បាននិយាយថា ប្រទេសទាំងពីរ កំពុងបង្កើនកិច្ចខិតខំប្រឹងប្រែងផ្នែកការទូត ខណៈ ប្រទេសទាំងពីរព្យាយាមខិតកាន់តែជិតការព្រមព្រៀងគ្នាលើស្ថានភាពនៅប្រទេសអ៊ុយក្រែន។