អ៊ីស្រាអែលនិយាយថា ខ្លួននឹងមិនដកកងទ័ពរបស់ខ្លួនចេញពីព្រំដែនតំបន់ហ្កាហ្សាស្ទ្រីប ជាមួយអេហ្ស៊ីប ទេ ទោះបីជាការពិតដែលថា ការដកកងទ័ពពេញលេញចេញពីតំបន់ហ៊ុមព័ទ្ធនេះ គឺជាផ្នែកនៃដំណាក់កាលទីពីរនៃកិច្ចព្រមព្រៀងបទឈប់បាញ់ជាមួយក្រុមហាម៉ាសអ៊ីស្លាមនិយម ក៏ដោយ។

នៅក្រោមកិច្ចព្រមព្រៀងបទឈប់បាញ់រយៈពេល៦សប្តាហ៍ ក្រុមហាម៉ាស បានដោះលែងចំណាប់ថ្នូរអ៊ីស្រាអែល៣៣នាក់ ដែលត្រូវបានឃុំខ្លួននៅតំបន់ហ្កាហ្សា ហើយអ៊ីស្រាអែល បានដោះលែងអ្នកជាប់ឃុំប៉ាឡេស្ទីនប្រហែល១.៧០០នាក់ កាលពីថ្ងៃព្រហស្បតិ៍។ នេះបានកត់សម្គាល់ពីការបញ្ចប់នៃការដោះដូរដំណាក់កាលទី១ ដែលត្រូវបានកំណត់ថានឹងផុតកំណត់នៅថ្ងៃសៅរ៍ ស្អែកនេះ។

ភាគីទាំងពីរ នឹងចរចាអំពីការអនុវត្តដំណាក់កាលទីពីរ ដែលរួមមានការដោះលែងចំណាប់ថ្នូរអ៊ីស្រាអែលចំនួន៥៩នាក់ដែលនៅសល់ ការបញ្ចប់ការប្រយុទ្ធ និងការដកកងទ័ពអ៊ីស្រាអែលទាំងអស់ចេញពីតំបន់ហ្កាហ្សា។

ប៉ុន្តែមន្ត្រីអ៊ីស្រាអែលម្នាក់ បាននិយាយកាលពីថ្ងៃព្រហស្បតិ៍ថា អ៊ីស្រាអែលនឹងមិនដកកងទ័ពចេញពីច្រករបៀង Philadelphia ជាដែនដីលាតសន្ធឹងតាមបណ្តោយព្រំដែនភាគខាងត្បូងតំបន់ហ្កាហ្សា ជាមួយប្រទេសអេហ្ស៊ីប នោះទេ។ មន្ត្រីរូបនេះបានសង្កត់ធ្ងន់ថា អ៊ីស្រាអែល នឹងមិនអនុញ្ញាតឱ្យក្រុមហាម៉ាស ពង្រឹងកម្លាំងតាមរយៈការរត់ពន្ធឡើយ។