រដ្ឋមន្ត្រីការពារជាតិបារាំង និយាយថា ប្រទេសរបស់លោក បានពិភាក្សាជាមួយអ៊ុយក្រែន អំពីការប្រើប្រាស់ធនធានរ៉ែរបស់អ៊ុយក្រែននៃឧស្សាហកម្មយោធារបស់ប្រទេសបារាំង។ នៅក្នុងបទសម្ភាសន៍មួយ កាលពីថ្ងៃព្រហស្បតិ៍ លោក Sebastien Lecornu បានបង្ហាញថា ទីក្រុងប៉ារីស និងទីក្រុងគីវ បានជួបពិភាក្សាគ្នា ចាប់តាំងពីខែតុលា ឆ្នាំមុន មក។

លោក Lecornu និយាយថា នៅពេលដែលប្រធានាធិបតីអ៊ុយក្រែន លោក Volodymyr Zelenskyy បានធ្វើទស្សនកិច្ចនៅប្រទេសបារាំងកាលពីរដូវស្លឹកឈើជ្រុះឆ្នាំមុន លោក Zelenskyy បានដាក់បញ្ចូលបញ្ហានៃវត្ថុធាតុដើមនៅក្នុងការពិភាក្សាអំពី «ផែនការជ័យជម្នះ» របស់លោកសម្រាប់ការបញ្ចប់ការឈ្លានពានរបស់រុស្ស៊ី។

លោក Lecornu បានពន្យល់ថា ប្រទេសបារាំង នឹងត្រូវការចំនួនជាក់លាក់នៃវត្ថុធាតុដើមសំខាន់ៗសម្រាប់ប្រព័ន្ធសព្វាវុធរបស់ខ្លួនក្នុងរយៈពេលវែង។ លោកបានសង្កត់ធ្ងន់ថា ប្រទេសរបស់លោក មិនចាត់ទុកវត្ថុធាតុដើមនេះជាសំណងសម្រាប់ជំនួយដែលខ្លួនបានផ្តល់ទៅឲ្យអ៊ុយក្រែន នោះទេ។

ការលើកឡើងរបស់លោក Lecornu ធ្វើឡើងនៅមុនដំណើរទស្សនកិច្ចរបស់ លោក Zelenskyy ទៅកាន់ទីក្រុង Washington។ សហរដ្ឋអាមេរិក និងអ៊ុយក្រែន ត្រូវបានគេរំពឹងថានឹងចុះហត្ថលេខាលើកិច្ចព្រមព្រៀងរ៉ែ នៅថ្ងៃសុក្រនេះ។