សេចក្ដីសង្ខេបលើការស៊ើបអង្កេតរបស់យោធាអ៊ីស្រាអែល ដែលចេញផ្សាយនៅថ្ងៃព្រហស្បតិ៍ (២៧ កុម្ភៈ) សប្ដាហ៍នេះបង្ហាញថា យោធាអ៊ីស្រាអែលបានមើលស្រាលសមត្ថភាពរបស់ក្រុមហាម៉ាសយ៉ាងខ្លាំង មុនការវាយប្រហាររបស់ក្រុមប្រដាប់អាវុធនេះលើអ៊ីស្រាអែល នៅថ្ងៃទី០៧ ខែតុលា ឆ្នាំ២០២៣ ហើយ "បានបរាជ័យក្នុងបេសកកម្មការពារជនស៊ីវិលអ៊ីស្រាអែល"។

សេចក្តីសង្ខេបបាននិយាយថា ការយល់ឃើញដែលថាក្រុមហាម៉ាស មិនចាប់អារម្មណ៍នឹងជម្លោះទ្រង់ទ្រាយធំ ហើយថាអ៊ីស្រាអែល នឹងមានការព្រមានយ៉ាងទូលំទូលាយជាមុនប្រសិនបើមានសកម្មភាពណាមួយ ខណៈមិនមានបញ្ហាជាច្រើនឆ្នាំមកហើយ ជាហេតុផលដែលនាំឱ្យខ្វះការត្រៀមខ្លួន និងសមត្ថភាពក្នុងការឆ្លើយតបចំពោះការវាយប្រហារ។

ការស៊ើបអង្កេតបានពិនិត្យលើយុទ្ធសាស្ត្រយោធារបស់អ៊ីស្រាអែល ឥរិយាបថប្រយុទ្ធ និងចារកម្មសម្ងាត់ នៅមុនពេល អំឡុងពេល និងក្រោយថ្ងៃទី០៧ ខែតុលា ឆ្នាំ២០២៣ ជាពេលវេលាដែលពួកឧទ្ទាមហាម៉ាស បានវាយលុកភាគខាងត្បូងអ៊ីស្រាអែល ដោយសម្លាប់មនុស្សប្រមាណ ១.២០០នាក់ និងចាប់ចំណាប់ថ្នូរជាង ២៥០នាក់ នេះបើតាមតួលេខអ៊ីស្រាអែល។

មន្ត្រីសុខាភិបាលប៉ាឡេស្ទីនបានឱ្យដឹងថា មនុស្សជាង ៤៨.០០០នាក់ ត្រូវបានសម្លាប់នៅក្នុងការវាយលុកសងសឹករបស់អ៊ីស្រាអែល លើតំបន់ហ្កាហ្សា ចាប់តាំងពីពេលនោះមក។ ភាគច្រើននៃតំបន់នេះត្រូវបានបំផ្លាញ ហើយទីភ្នាក់ងារមនុស្សធម៌និយាយថា ភាគច្រើននៃចំនួនប្រជាជនមុនសង្គ្រាម ២,៣លាននាក់នៃទឹកដីនេះ ត្រូវបានបង្ខំឱ្យភៀសខ្លួនជាច្រើនដង៕