មន្ត្រីជាន់ខ្ពស់អង្គការសហប្រជាជាតិបាននិយាយថា អំពើហិង្សានៅក្នុង និងជុំវិញជំរំ Zamzam ជាជំរំជនភៀសខ្លួនរងគ្រោះទុរភិក្សនៅក្នុងប្រទេសស៊ូដង់ ព្រមទាំងនៅក្នុងរដ្ឋធានី Khartoum និងតំបន់ភាគខាងត្បូង បានកើនឡើងកាន់តែខ្លាំងនាពេលថ្មីៗនេះ ដោយអំពាវនាវឱ្យមានកិច្ចខិតខំប្រឹងប្រែងរបស់អន្តរជាតិដើម្បីការពារជនស៊ីវិល។

លោកស្រី Edem Wosornu នាយកផ្នែកប្រតិបត្តិការ និងតស៊ូមតិនៅការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយទៅកាន់ក្រុមប្រឹក្សាសន្តិសុខអង្គការសហប្រជាជាតិថា រូបភាពផ្កាយរណប បញ្ជាក់ពីការប្រើប្រាស់សព្វាវុធធុនធ្ងន់នៅក្នុងនិងជុំវិញជំរំ Zamzam ក្នុងប៉ុន្មានសប្តាហ៍ថ្មីៗនេះ និងការបំផ្លាញទីផ្សារសំខាន់ៗនៅទីនោះ។

លោកស្រី និយាយថា ជនស៊ីវិលដែលភ័យខ្លាច រួមទាំងបុគ្គលិកមនុស្សធម៌ ពុំអាចចាកចេញពីតំបន់នោះបានទេ នៅពេលដែលការប្រយុទ្ធគ្នាកាន់តែខ្លាំងឡើង។

វាត្រូវបានគេប៉ាន់ប្រមាណថា ជនស៊ីវិលភៀសខ្លួនប្រហែល ៥០០.០០០នាក់ កំពុងរស់នៅក្នុងជំរំ Zamzam ជាកន្លែងដែលស្ថានភាពទុរ្ភិក្ស ត្រូវបានបញ្ជាក់ដោយអ្នកជំនាញពិភពលោក កាលពីខែសីហា ឆ្នាំមុន។