រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយថា កងកម្លាំងការពារអ៊ីស្រាអែល (IDF) កំពុងបន្តនៅក្នុងតំបន់ទ្រនាប់ព្រំដែន ជាមួយប្រទេសលីបង់ ដោយមិនកំណត់ពេលច្បាស់។

ការិយាល័យរបស់លោករដ្ឋមន្ត្រី បានដកស្រង់សម្តីលោក Katz ដែលបាននិយាយនៅក្នុងសន្និសីទរបស់ប្រធានអាជ្ញាធរមូលដ្ឋាន ក្នុងប្រទេសអ៊ីស្រាអែលថា៖«មានតំបន់ទ្រនាប់ (នៅព្រំដែនជាមួយប្រទេសលីបង់)។ វាមិនងាយស្រួលទេ ប៉ុន្តែខ្ញុំមិនផ្លាស់ប្តូរជំហររបស់ខ្ញុំទេ ហើយយើងបានទទួលភ្លើងខៀវពីសហរដ្ឋអាមេរិក។ យើងបានផ្តល់ឲ្យពួកគេ នូវផែនទី ហើយយើងកំពុងបន្តនៅ ដោយមិនកំណត់ពេល ហើយការបន្តនៅនេះ គឺអាស្រ័យលើស្ថានភាព មិនអាស្រ័យលើពេលវេលាទេ។ 

នៅថ្ងៃទី ១៧ ខែកុម្ភៈ សារព័ត៌មាន Ynet បានរាយការណ៍ថា កងកម្លាំងការពារអ៊ីស្រាអែល (IDF) នឹងដកខ្លួនចេញពីភាគខាងត្បូងប្រទេសលីបង់ ជាផ្នែកនៃកិច្ចព្រមព្រៀងឈប់បាញ់ ប៉ុន្តែនឹងនៅតែស្ថិត ក្នុងទីតាំងយុទ្ធសាស្ត្រចំនួន ៥កន្លែង។ យោងតាមវិទ្យុ Kan កងទ័ពអ៊ីស្រាអែល នឹងបន្តនៅក្នុងទីតាំងទាំង ៥ នេះ ដើម្បីរារាំងអង្គភាពនានារបស់ក្រុមហេសបូឡា (Hezbollah)ពីការបន្តសកម្មភាពរបស់ពួកគេឡើងវិញ នៅភាគខាងត្បូងប្រទេសលីបង់។

កិច្ចព្រមព្រៀងបទឈប់បាញ់ ដែលបានឈានដល់នៅថ្ងៃទី ២៧ ខែវិច្ឆិកា ឆ្នាំ ២០២៤ ជាលទ្ធផលនៃការសម្រុះសម្រួលរវាងសហរដ្ឋអាមេរិក និងបារាំង បានអំពាវនាវឲ្យមានការដាក់ពង្រាយកងទ័ពលីបង់ នៅតាមព្រំដែនភាគខាងត្បូងទាំងមូល ដែលគាំទ្រដោយកងរក្សាសន្តិភាពរបស់អង្គការសហប្រជាជាតិ និងការដកកងកម្លាំងហេសបូឡា ឆ្លងកាត់ទន្លេ Litani ។ អ៊ីស្រាអែល ត្រូវដកទ័ពចេញពីលីបង់ភាគខាងត្បូង ជាកន្លែងដែលខ្លួនកំពុងធ្វើប្រតិបត្តិការជើងគោក ក្នុងរយៈពេល ៦០ថ្ងៃ។ កាលពីថ្ងៃទី ២៧ ខែមករា សេតវិមាន បានប្រកាសថា កិច្ចព្រមព្រៀងមួយ ត្រូវបានឈានដល់ ដើម្បីបន្តលក្ខខណ្ឌនៃការដកអង្គភាពអ៊ីស្រាអែល ចេញពីទឹកដីលីបង់ រហូតដល់ថ្ងៃទី ១៨ ខែកុម្ភៈ។