ប្រធានាធិបតីរុស្ស៊ី លោក Vladimir Putin បានជួបជាមួយមេដឹកនាំនៃគណបក្សរបស់កូរ៉េខាងជើង ដែលជាសញ្ញាចុងក្រោយនៃទំនាក់ទំនងកាន់តែស៊ីជម្រៅ រវាងប្រទេសទាំង២ ខណៈដែលលោក គីម ជុងអ៊ុន (Kim Jong Un) បានពោលសរសើរពីការសាកល្បងមីស៊ីលយុទ្ធសាស្ត្រថ្មី នៅដើមសប្តាហ៍នេះ ដែលជាកិច្ចប្រឹងប្រែងពង្រឹង «ខែលការពារនុយក្លេអ៊ែរ» របស់លោក។

សារព័ត៌មាន Interfax របស់រុស្ស៊ី កាលពីថ្ងៃព្រហស្បតិ៍ (ទី២៧ ខែកុម្ភៈ) បានរាយការណ៍ថា នៅទីក្រុងមូស្គូ លោក Putin បានជួបពិភាក្សាជាមួយគណៈប្រតិភូកូរ៉េខាងជើង ដឹកនាំដោយលោក Ri Hi Yong លេខានៃគណៈកម្មាធិការមជ្ឈិមបក្សដែលកំពុងកាន់អំណាចរបស់កូរ៉េខាងជើង គឺបក្សពលករ។

សេចក្ដីរាយការណ៍នេះបានកើតឡើងភ្លាមៗបន្ទាប់ពីទីក្រុងសេអ៊ូល បានប្រាប់ឲ្យដឹងថា កូរ៉េខាងជើងហាក់ដូចជាបានបញ្ជូនទាហានបន្ថែមទៀតទៅកាន់រុស្ស៊ី ដើម្បីជួយគាំទ្រដល់សង្គ្រាមរបស់លោក Putin ប្រឆាំងនឹងអ៊ុយក្រែន ដោយបន្ថែមពីលើចំនួនទាហានរាប់ពាន់នាក់ដែលត្រូវបានបញ្ជូន នៅឆ្នាំ២០២៤។

គួរបញ្ជាក់ថា លោក គីម បានលេចមុខឡើងក្លាយជាសម្ព័ន្ធមិត្តដ៏សំខាន់ សម្រាប់លោក Putin និងសង្រ្គាមរបស់លោក នៅប្រទេសអ៊ុយក្រែន ដោយបានជួយជំរុញដល់វត្តមានប្រយុទ្ធរបស់ទីក្រុងមូស្គូ សម្រាប់ផ្លូវគោក ជាថ្នូរនឹងជំនួយរបស់រុស្ស៊ី ដើម្បីយកទៅពង្រឹងវិស័យយោធាកូរ៉េខាងជើង និងជួយទ្រទ្រង់របបរបស់លោក គីម។

កាលពីថ្ងៃទី២៦ ខែកុម្ភៈ មេដឹកនាំកូរ៉េខាងជើង បានចុះត្រួតពិនិត្យមើលសមយុទ្ធបាញ់បង្ហោះមីស៊ីលតម្រង់គោលដៅយុទ្ធសាស្ត្ររបស់ប្រទេស ហើយបានអំពាវនាវឲ្យ «កងកម្លាំងនុយក្លេអ៊ែរត្រៀមខ្លួនប្រយុទ្ធឲ្យបានរឹងមាំបន្ថែមទៀត និងការត្រៀមទាំងស្រុង ដើម្បីប្រើប្រាស់អាវុធរបស់ពួកគេ»៕