លោក David McGuinty រដ្ឋមន្ត្រីក្រសួងសុវត្ថិភាពសាធារណៈ កាលពីថ្ងៃព្រហស្បតិ៍ (ទី២៧ ខែកុម្ភៈ) បាននិយាយថា វឌ្ឍនភាពដែលកាណាដា បានធ្វើលើការរឹតបន្តឹងសន្តិសុខនៅតាមព្រំដែន ជាមួយសហរដ្ឋអាមេរិក និងការប្រយុទ្ធប្រឆាំងនឹងការរត់ពន្ធគ្រឿងញៀន គួរតែធ្វើឲ្យរដ្ឋបាលរបស់លោក Donald Trump ពេញចិត្ត។

ប្រធានាធិបតីលោក Trump បាននិយាយថា ការស្នើដំឡើងពន្ធរបស់លោក លើប្រទេសម៉ិកស៊ិក និងកាណាដា នឹងចូលជាធរមាន នៅថ្ងៃទី៤ ខែមីនា ដូចដែលបានគ្រោងទុក ដោយផ្អែកលើហេតុផលថា គ្រឿងញៀននៅតែហូរចូលសហរដ្ឋអាមេរិកពីប្រទេសទាំង២។

នៅក្នុងសុន្ទរកថាតាមទូរទស្សន៍ទៅកាន់អ្នកសារព័ត៌មាន នៅទីក្រុងវ៉ាស៊ីនតោន លោក McGuinty បាននិយាយថា៖ «យើងពិតជាជឿជាក់ថា កិច្ចប្រឹងប្រែងដែលយើងបានធ្វើកន្លងមក គួរតែបំពេញចិត្តរដ្ឋបាលរបស់សហរដ្ឋអាមេរិក»។

លោកបានបន្ថែមថា៖ «ភស្តុតាងមិនអាចប្រកែកបាន ពោលគឺវឌ្ឍនភាពកំពុងកើតមានឡើង។ តាមទស្សនៈរបស់ខ្ញុំ ការធ្វតេស្តណាមួយដែលត្រូវបានដាក់លើប្រទេសកាណាដា ក្នុងចំណែកនៃវឌ្ឍនភាព និងការបំពេញតាមស្តង់ដារ សម្រាប់ព្រំដែន ខ្ញុំជឿថា ការសាកល្បងនោះត្រូវបានបំពេញហើយ»។

ទិន្នន័យផ្លូវការបង្ហាញថា គ្រឿងញៀនភាគច្រើនដែលត្រូវបានចាប់ នៅក្នុងសហរដ្ឋអាមេរិក គឺមកពីប្រទេសម៉ិកស៊ិក។ ទីភ្នាក់ងារសេវាកម្មព្រំដែនកាណាដា បានឲ្យដឹងកាលពីថ្ងៃព្រហស្បតិ៍ថា ខ្លួនកំពុងចាប់ផ្តើមគំនិតផ្តួចផ្តើមឆ្លងប្រទេសដែលមានគោលដៅស្ទាក់ចាប់ជនល្មើសខុសច្បាប់ ដែលបានទៅដល់ និងចាកចេញពីប្រទេស ដោយផ្តោតលើសារធាតុហ្វង់តានីល និងគ្រឿងញៀនសំយោគផ្សេងទៀត៕