ក្នុងហាងរបស់ខ្លួន នៅកូសូវ៉ូ លោក Kenan Gashi បានយកអវយវៈពីរូបម៉ាឡាកាំង ហើយដាក់វាចូលទៅក្នុងម៉ាស៊ីនដែលផ្តល់ដោយរដ្ឋាភិបាលសហរដ្ឋអាមេរិក ដែលកាត់ច្រៀក និងសម្អាតប្លាស្ទិក មុនពេលដែលអាចយកទៅលក់បាន សម្រាប់ការប្រើប្រាស់ឡើងវិញ។

អាជីវកម្មកែឆ្នៃរបស់លោក Gashi នៅទីក្រុង Fushe Kosova ត្រូវបានផ្លាស់ប្តូរ នៅពេលដែលទទួលបានឧបករណ៍ពីទីភ្នាក់ងារជំនួយអន្តរជាតិរបស់សហរដ្ឋអាមេរិក (USAID) កាលពី ២ឆ្នាំមុន ដែលជំរុញឲ្យលោកបង្កើតផែនការជួលកម្មករបន្ថែមទៀត។

ប៉ុន្តែនាពេលនេះ លោក Gashi ចាប់ផ្ដើមមានការព្រួយបារម្ភ។ ជាង ១ភាគ៣នៃតម្លៃ ១៣០.០០០ដុល្លារ ពីការសន្យាផ្ដល់សម្ភារៈ នៅតែមិនទាន់ទៅដល់។ ហើយឥឡូវនេះ រដ្ឋបាលរបស់លោកប្រធានាធិបតី Donald Trump បានផ្អាកមូលនិធិរបស់ USAID ទៀត ព្រមទាំងបានព្យាយាមកាត់បន្ថយយ៉ាងខ្លាំងនូវទីភ្នាក់ងារជំនួយ និងជំនួយបរទេសទាំងអស់របស់សហរដ្ឋអាមេរិក ក្រោមរបៀបវារៈ «America First» (អាមេរិកទី១) របស់លោក។

កាលពីសប្តាហ៍មុន នៅក្នុងសេចក្តីថ្លែងការណ៍ជាវីដេអូមួយទៅកាន់សារព័ត៌មាន លោក Trump បានលើកឡើងពីការបរិច្ចាគដល់ការងារកែឆ្នៃ នៅកូសូវ៉ូថា ជាគំរូនៃប្រភេទ សម្រាប់ការចំណាយរបស់រដ្ឋាភិបាល ដែលលោកចង់កាត់បន្ថយ។

គួរបញ្ជាក់ថា បើយោងតាមតួលេខរបស់រដ្ឋាភិបាលសហរដ្ឋអាមេរិក បានឲ្យដឹងថា សហរដ្ឋអាមេរិក គឺជាអ្នកគាំទ្រដ៏ធំបំផុតមួយរបស់កូសូវ៉ូ ចាប់តាំងពីប្រទេសបាល់កង់ដ៏តូចមួយនេះដែលមិនមានព្រំដែនសមុទ្រ បានផ្តាច់ខ្លួនចេញពីប្រទេសស៊ែប៊ី ដោយបានផ្តល់ជំនួយចំនួន ១,១ពាន់លានដុល្លារ ចាប់តាំងពីឆ្នាំ២០០១ មក៕