បាល់ទាត់៖ ក្រោយលើកពេលដោយសារមានភ្លៀងធ្លាក់ខ្លាំងកាលពីម្សិលមិញ ក្រុមបឹងកេតនឹងបន្ដបើកទ្វារកីឡដ្ឋានខេមបូឌាអ៊ែរវ៉េទទួលក្រុមវិសាខាបន្ដការប្រកួតនារសៀលនេះ ដើម្បីកាត់សេចក្ដីក្រុមឈ្នះឡើងវគ្គផ្ដាច់ព្រ័ត្រជួបក្រុមព្រះខ័នរាជស្វាយរៀង។
ជំនួបវគ្គពាក់កណ្ដាលផ្ដាច់ព្រ័ត្ររវាងក្រុមទាំងពីរបានដំណើរការប្រកួត ៥៣នាទីប៉ុណ្ណោះកាលពីរសៀលថ្ងៃទី២២ ខែវិច្ឆិកាម្សិលមិញ តែដោយសារមានភ្លៀងធ្លាក់ខ្លាំងមិនអាចបន្ដការប្រកួតបាន ក្រោយធ្វើការពន្យារពេល ៣០នាទី ២ដង គណៈកម្មការក៏សម្រេចលើកពេលការប្រកួតមកលេងនៅរសៀលថ្ងៃអង្គារនេះវិញ។ សម្រាប់រយៈពេល ៥៣នាទីនៃការប្រកួតកាលពីម្សិលមិញ ក្រុមម្ចាស់ផ្ទះបឹងកេតកំពុងនាំមុខក្រុមការពារតំណែងជើងឯកវិសាខា ១-០ ដែលធ្វើសម្រេចដោយខ្សែការពារ សឿត ណាវ៉ា នៅនាទី១៧។ ដូច្នេះថ្ងៃនេះក្រុមទាំងពីរ នឹងត្រូវបន្ដការប្រកួតពីនាទី៥៣ ខណៈបើស្មើគ្នានឹងបន្ថែម ១៥នាទី ២ដងមុនឈានដល់ការទាត់បាល់ប៉េណាល់ទីកាត់សេចក្ដី។ គួរដឹងថា ក្រុមទទួលបានជ័យជម្នះរវាងក្រុមទាំងពីរ នឹងត្រូវឡើងទៅជួបក្រុមព្រះខ័នរាជស្វាយរៀងនៅវគ្គផ្ដាច់ព្រ័ត្រនាថ្ងៃទី២៥ ខែវិច្ឆិកាខាងមុខ ដើម្បីដណ្ដើមជើងឯកពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ជាតិ) ឆ្នាំ២០២១៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
